New York, Rymphang:
U President ka United States- u Joe Biden ha ka Sngi Nyngkong u la pynpaw ba ka don ka jingkyrmen ba ka thma hapdeng ka Israel bad ka Gaza ka lah ban sangeh noh shen ha kane ka taiew ka ban wan lada kiei-kiei baroh ki iaid beit-iaid ryntih kumba la pynkhreh.
La ong ba da ka jing iatreilang jong kiba bun ki ri kum ka Egypt, Qatar, United States, ka France bad kiwei, la ong ba ka don ka jingkyrmen ha kane ka sien ba ka thma Israel ka lah ban sangeh ne kut noh bad ba ki lehnoh Hamas ruh kin pyllait noh ia baroh kito kiba ka la rahbor baroh shi katta.
Katei ka jingiapynbeit kan kynthup ruh ia ka jingpyllait markylliang la ka long ia kito kiba shah rahbor ha ki Hamas bad kumjuh ruh kito ki nong Palestine kiba shah kem bad shah bat ha ka Israel la slem hynrei kiba ka Israel kan hap ban pyllait noh markylliang lada ka kwah ia ka jingbha ha kane ka sien.
Kumta, u Biden ha ka Sngi Ba-ar u la ong ba la ngeit skhem ba kumno-kumno ha kane ka Lah Sngi U Blei jong kane ka taiew ban wan, katei ka thma hapdeng ka Israel bad ka Gaza ka dei ban kut noh bad ka US ka kyrmen skhem ia kane.
Namar la ong ba ki don ki nongialam bapher bapher ki la leit ban ïadon bynta lang ha katei ka jingialang kaba la pynlong ha Paris ha kine ki khyndiat sngi ba la leit bad baroh kitei ki nong-ialam jong ki ri bapher bapher ki la iabeit ban ialeh shitom kumno ban pynsangeh noh ia ka thma jong ka Israel pyrshah ia ka Gaza.
Kumjuh ruh na ka liang ki heh ka Israel ki la pynpaw ba ka Israel ruh ka long ba la kloi ban poi sha ka mat jingiakren ïasuk noh. Nalor nangta, la ong ruh ba kin don ki heh jong ka tnat shipai bad ka tnat syntiat jong ka Israel ki ban leit sha Qatar na ka bynta kane jingiakren.
