Shillong, Rymphang 28
Ka synjuk ïalehkai jong ka Bangladesh Football Federation ka la pyrshang ban wanrah da u rangïalehkai shapdeng ka Leicester City u Hamza Choudhury ban ïadon bynta bad ka kynhun ïalehkai kane ka ri na ka bynta ka lympung ïaknieh FIFA World Cup 2026 (Qualifiers) ka ban long ha u Lber.
U Choudhary, uba la kha ha Loughborough kaba ha England, u lah ban ïalehkai na ka bynta ka kynhun ïalehkai phutbol jong ka Bangladesh na ka daw ba ki kmie ieit kpa ieit ki dei ki nongshong shnong jong katei ka ri. Te kumta une u rangïalehkai ba dang 26 snem ka rta um pat ju ïoh ïa ka lad ban mihkhmat na ka bynta katei ka kynhun ïalehkai (senior) bad la sngewthuh ba u lah ban ïalehkai na ka bynta ka Bengladesh ha katei ka jingïalehkai shabar ri.
Na ka liang ka kynhun ïalehkai jong ka Bangladesh kan pynkhreh ïa ka jingkilanmet naduh kaba sdang jong u Lber na ka bynta ban long ba la pynkhreh ïa katei ka lympung ïaknieh rung World Cup pyrshah ïa la Palestine. Te kumta ka la kwah ba u Hamza un ïadon bynta ha kane ka prokram kilanmet bad ruh ban ïadon bynta ha kitei ki jingïalehkai ki ban long hashwa ban kut u Lber.
Na ka liang u manager ka kynhun ïalehkai jong ka Bengladesh u Amer Khan u la pynthikna ba ka synjuk ka la pyrshang ban wanrah ïa u Hamza Choudhury ba un ïadon bynta hapoh ka kynhun na ka bynta katei ka lympung ïaknieh.
Te kumta ka synjuk ïalehkai jong ka Bangladesh ka donkam ban ïamynjur lang bad ka Leicester City na ka bynta ban shah ïa u Hamza ba un ïadon bynta ha kitei ki lympung ïaknieh jong ka FIFA World Cup ki ban long ha u Lber. Hynrei ka Leicester ka dangdon hapdeng ka jingïaknieh na ka bynta ban rah ïa ka nam lahduh ha ka Championship, te kumta ym lah ban pynthikna la katei ka klob kan ailad ne em ïa utei u rangïalehkai shapdeng ha kum kane ka por kaba kham kongsan.
Lah ban pynkynmaw ba u Hamza uba ki kmie ïeit bad ki kpa ïeit ki dei ki nongshong shnong ba pura jong ka Bangladesh, ha ka por ba u dangkhynnah u ju wan sha Habiganj. Hynrei kat kum ki kyndon aiñ jong ka FIFA la shah ïa ki nongïalehkai kiba na kylleng jong ki kiba don ia ka jinglong tynrai ba ki lah ban ïalehkai na ki ri jong ki.
Kham hashwa, u Hamza Choudhury u la ïoh ïa ka lad ban mihkhmat ïa ka England ha ka kyrdan ïalehkai (youth) ha kaba u la ïoh ban ïalehkai hynñiew sien na ka bynta ka kynhun ïalehkai U-21.
U Hamza u la ïoh ruh ban ïalehkai haduh 30 sien na ka bynta ka Leicester City mynta ka aïom bad u la long uba ju mlien ban ïalehkai ha ka Premier League ha kaba u la ïoh ban ïashim bynta 53 sien ha ki lympung ïalehkai bapher bapher, bad u la ïoh ban thep shi kol bad ïarap pynbuh ar sien.
