Shillong, Rymphang 28
Ka ilekshon jong ka synjuk ïalehkai jong ka All India Chess Federation (AICF) ka lah ban ym don ki ban ïakhun pyrshah hadien ba ki la don tang 15 ngut kiba la wan thep kyrteng na ka bynta 15 tylli ki kam jong kane ka synjuk.
Ki ar ngut ki Returning Officer ïa kiba la thung na ka bynta ka ilekshon kiba kynthup ïa u Justice G.S. Sistani (retd) bad u Justice Rang Nath Pandey (retd) ha ka sngi ba-ar ki la pynbna ba ki la don 15 ngut kiba la thep kyrteng na ka bynta ki 15 tylli ki kam ha ka AICF.
“Ki dkhot kiba la wan ai jingtip naduh ka 27 tarik u Rymphang 2024 haduh ka por 3 baje janmiet la ïohpdiang ïa kiba la wan thep kyrteng kiba don tang 15 ngut na ka bynta ki 15 tylli ki kam,” la pynpaw kitei ki ar ngut ki Returning Officer.
“U Nitin Narang na ka Haryana Chess Association u la wan thep kyrteng na ka bynta ka kam President, u Dev A. Patel na Gujarat State Chess Association na ka bynta ka kam Secretary bad u Dharmendra Kumar na ka All Bihar Chess Association na ka bynta ka kam Treasurer.”
Ka jingthung na ka bynta ki hynriew ngut ki ban ïoh ïa ka kam Vice President bad hynriew ngut na ka bynta ka kam Joint Secretary. La ong ba ki dkhot kin hap ban ïamynjur ka kum ka jingbthah da ka Delhi High Court ba kim dei ban pynkheiñ ïa ki kyndon jong ka National Sports Development Code, 2011.
Kat kum ka jingpynbna kaba kham hashwa da ka AICF, yn bishar thuh ïa ki nongthep kyrteng ha ka 1 tarik u Lber ha ka por 10.45 mynstep bad yn sa pynbna ïa kiba dei hok ban ïoh ïashim bynta. Ka jingweng ïa kiba thep kyrteng kan long naduh 1 tarik haduh 3 tarik u Lber haduh ka por 3 baje janmiet. Ïa ka thup kyrteng jong kiba wan thep kyrteng yn sa pynbna ha ka 4 tarik. Lada donkam yn sa pynlong ïa ka ilekshon ha ka General Body Meeting ka ban long ha ka 10 tarik u Lber bad ha kajuh ka sngi yn sa pynbna ïa ki nongjop.
