Shillong, Rymphang 28
Ka Young Guns ka la khur ïa ka jingjop ha ka lympung ïalehkai First Division Shillong Cricket League hadien ba ka la lah ban pynliem noh ïa ka Riatsamthiah CC da 69 run ha ka sngi Balang ha madan Polo.
Ha kane ka jingïakhun, ka Young Guns ka la kam trai ban tied nyngkong ha kaba ka la ïoh 222 run bad shah pynhap 9 wiket ha ki 40 over. U Manthan Dey u la ïoh ban khyrwit 70 run na ki 74 bol bad u Raja Khongwir u la ïoh 26 run na ki 39 bol. Katba u Shaisngi Lyngdoh bad u Jerry Lyngdoh ki la khur mar 3 wiket.
Haba wan beh ïa ka thong, ka Riatsamthiah ka la ïoh tang 153 run bad shah pynhap 10 wiket ha ki 29.3 over. U Wallambok Nongkhlaw u la tied 40 run na ki 39 bol bad u Jerry Lyngdoh u la ïoh 23 run na ki 67 bol. Katba u Rudra Singh Rathore u la khur 4 wiket bad ia ki 3 wiket la khur da u Pankaj Sharma. Ïa ka nam Player of the Match la khur da u Rudra Singh Rathore.
