Senatobia, Rymphang:
Kawei ka briew na US ka la pynrem jur ia ki pulit halor ka jingkem ia u khun ba 10 snem jong ka namar ka jingleit shabar ha ka jaka paidbah. Kumta ruh katei ka briew ka la ujor kylla da ka ejahar pyrshah ia ka City of Senatobia hapoh Mississippi da kaba dawa ruh ia ka bai mynraiñ khmat kaba $2 Million.
U Quantavious Eason, u la shah rah sha thanat ha u Nailar mynshem snem (2023) ha uwei pulit ban tohkit namar katei ka jingleit shabar ha jaka paidbah bad shadien ka kali jong ka kmie hapoh ka jaka pynieng kali (Parking Lot). La ong ba ki pulit kiba kem ia u ha katei ka por kim shym la teh hatkari ia u hynrei utei u khynnah rit u la shah pynshong hapoh patok kumba shi kynta duna eiei.
Namarkata, katei ka kmie jong utei u khynnah ka la dawa ba ki bor pyniaid jong katei ka nongbah ki dei ban leh eiei halor kane bad ba ki dei ruh ban siew ka bai mynraiñ khmat kaba $2 Million namar katei ka jingshah leh be-aiñ u khun jong ka ha katei ka jingjia.
Katkum katei ka jingmudui ba ka la leit ban ujor kylla ia katei ka jingleh ki pulit, katei ka longkmie ka la ong ba haduh mynta hi utei u khun jong ka u dang hap ban mad ia ki jinglehraiñ bad jingshah kren sharum shaneng bad kane ka la ktah jur ia ka jingmut-jingpyrkhat jong, u bad kane ka lah ruh ban pynkylla ia ka jinglong jong u ne wanrah ia kano-kano ka jingma ia ka jingim jong u hadien-habud.
Shuh shuh ruh la ong ba tang shu iohi ia ki pulit, utei u khynnah u la shu khynñiuh bad khlem tip briew shuh kum uba la biej ne shoh tyndep namar katei ka jingjia.
Haba iadei bad kane, uwei heh pulit jong katei ka nongbah, u la ong ba ka jingkem ia utei u khynnah ka long ka jingbakla ka rukom pyniaid ki bor pyniaid lane ki pulit ha katei ka por. U la kubur ruh ba ki pulit hi ki la pyndonkam bakla ia ka bor bad iaid lait ia ki kyndon aiñ ba la buh haba iadei bad katei ka jingjia, ha kaba utei u khynnah u dang don ruh tang 10 snem ka rta.
