Shillong, Rymphang 28
Ka jingangnud ka India ban ïoh pynlong ha ka sien kaba nyngkong eh ïa ka Olympics ha u 2036 ka lah ban don hapdeng ka jingïaknieh bad kiwei pat ki ri kiba kynthup ïa ka Spain, Indonesia, Turkey, Poland bad ka Qatar.
Ha u snen ba la dep, ka sorkar India ka la pynbna ïa ka jingangnud ban ïoh pynlong ïa ka Olympic Games bad kane ka la wan lyngba u Myntri Rangbaduh ka ri u Narendra Modi ha ka jingïalang jong ka International Olympic Committee (IOC).
U la pynpaw ïa ka jingthrang ki 1.4 billion ki nongshong shnong jong ka ri ban ïoh pynlong ïa katei ka lympung ïalehkai kaba heh. Haba ai jingkren, u la pynpaw ba ka ri ka la nangïai pynkhreh ïa ki jaka ïalehkai, ban wanrah ki kor ki bor katkum juk mynta bad ka jinglah ban pynlong ïa ki prokram kiba heh kum ka G20 Summit.
Hapdeng kane ka jingangnud ban ïoh pynlong ïa ka Olympics ha u 2036, hynrei ka India ka don hapdeng ka jingïaknieh bad kiwei ki ri ka pyrthei kum ka Spain, Qatar bad ka Indonesia namar kine ki ri ki la pynpaw ïa ka jingthrang ban ïoh pynlong ïa kane ka lympung kaba heh.
Ka Mexico, kaba la angnud ban ïoh pynlong ha u Risaw jong u snem 2022, ka la weng noh ïa kane ka jingthong. Ïa kane ka rai la pynbna da ka Maria Jose Alcala, kaba long ka president jong ka National Olympic Committee (COM).
Ka Spain, kaba la khmih lynti ban ïoh pynlong ïa ka Olympics ha u 2040, ka la pynleit jingmut mynta na ka bynta u snem 2036. Ka Isabel Daaz Ayuso, kaba long ka president jong ka Community of Madrid, ka la pynpaw ia ka jingthrang ban ïoh pynlong ïa ka Olympic Games ha u 2036 kata hadien ka Formula 1 Grand Prix. Kane kan long hadien sawphew snem ba ka la ïoh ban pynlong ïa ka Barcelona Olympics 1992.
Kumjuh ka Indonesia ka la ïai long ka ri kaba thrang ban ïoh pynlong ïa ka Olympics ha u 2036. Ka nongbah jong kane ka ri, ka Nusantara ka dangïai pynleit jingmut na ka bynta ka jingthong jong ka ri da kaba ka la ialeh ban pynbiang ïa ki jaka ïalehkai khnang ba kan long kaba la khreh na ka bynta katei ka lympung kaba heh.
Ka Turkey bad ka Poland ruh ki la pynpaw ïa ka jingthrang ban ïoh pynlong ïa ka Olympics 2036. Ka Warsaw kaba dei ka nongbah jong ka Poland, ka dangïai pynkhreh na ka bynta ki jaka ïalehkai bad kiwei ki jingdonkam na ka bynta kane ka lympung.
Haba phai sha ka Qatar, kaba la lah ban pynlong ïa ka FIFA World Cup, ka la khmih lynti ban ïoh pynlong sa katei ka lympung kaba heh ha u 2036. Kane ka ri ka don ïa ka jingsngewskhem namar ka World Cup ka la long kaba jop bad mynta kane ka ri ka thrang ban ïoh pynlong sa ka Olympics.
Na ka liang u Myntrika ka tnat ïalehkai jong ka Sorkar Pdeng u Anurag Thakur u la pynpaw ba ka India ka don jingkyrmen ban ïoh pynlong ïa ka Olympics 2036 namar ka ri ka la lah ban ïalehkai bha ha ki lympung ïalehkai shabar ri kum ka Tokyo Olympics 2020 bad ka Hangzhou Asian Games 2022. Lyngba kine ki jinglah ban ïalehkai bha, u Thakur u la khmih lynti ba ka India ka don jingkyrmen ban don ha ka thup kaba shiphew napdeng ki ri ka pyrthei ha u 2036 bad ruh kan don ha ka thup kaba san ha u 2047.
Ha kawei pat ka liang u Modi u la khmih lynti ba ka India ka don hok ban ïoh pynlong ïa ka Olympics ha u 2036 bad watla kan ïoh ban pynlong ïa ka Youth Olympics ha u 2030.
Na ka bynta ban pynlong ïa katei ka lympung ïalehkai kaba heh, ka India ka la pynkhreh ïa ka mang pisa kaba eh ha kine ki 10 snem na ka bynta ban pynlut ha kaba ïadei bad ki jaka ïalehkai. Ka jinglah ban buh ïa ki 23 tylli ki National Centres of Excellence (NCOEs), 69 ki SAI centre bad 1,075 ki shlem ai jinghikai jong ka Khelo India ki dei ki thong thong ka India na ka bynta ban kyntiew bad saiñ dur ïa ka lawei jong ka ri ha ka kam ïalehkai.
