Shillong, Rymphang 29
U rangialehkai barim ka Manchester United u Paul Pogba u la shah sospon haduh saw snem kynthih na ka daw ba u la pyndonkam drok.
Ha ka jingshisha une u rangïalehkai shapdeng u la shah sospon naduh u Nailur mynshem snem hadien ba la lap ba u la pyndonkam ïa ki jingdih kiba la khang pyrshah ha ka por ba u la ïalehkai na ka bynta ka kynhun ba khlaiñ bor na Italy ka Juventus. Kumta ha ka jingpeit bniah kaba ar ka la paw ba ka long positive na ka bynta ka DHEA.
Namar kata, na ka liang ka National Anti-Doping Tribunal ka la shim ïa ka rai ban pynshitom ïa u bad mynta la lah ban pynthikna ba u Pogba un ym lah ban ïalehkai haduh u snem 2028. Kane ka long ka jingshah pynshitom kaba jlan bha ïa kaba la ïohpdiang da utei u rangïalehkai ka France.
Kane ka mut ba u Pogba un kynjoh sha ka rta kaba 35 snem ha ka por ba un ïoh ban ïalehkai biang sa shisien pat. Kumba ka paw ka kontrak jong u Pogba bad ka Juventus kan kut haduh u snem 2026 bad mynta un ym ïoh shuh ban ïalehkai na ka bynta katei ka klob. Kane ka jingwanphai biang jong utei u khlur ïalehkai sha ka klob kaba rim ka la pulom noh namar un ym ïoh shuh ban ïalehkai.
Utei u rangïalehkai shapdeng uba la ïadon bynta bad ka France kaba la rah ïa ka nam lahduh ha ka World Cup 2018, u la leit phai biang sha Turin ha u 2022 hadien ba ka kontrak ka jong u ka la poi sha kaba kut bad ka Manchester United. Ha ka aïom kaba nyngkong u la ngat ha ka jingmynsaw bad hadien u la ïoh ban ïalehkai arsien mynta ka aïom hashwa ba un shah sospon.
Kumta ka jingkhmih lynti ban ïalehkai shabar ri ka la poi sha kaba kut. Kumba ka paw u Pogba u la ïoh ban ïalehkai 91 sien na ka bynta ka ri jong u bad ka jingïalehkai kaba khatduh ka dei ha u 2022 ha kaba u la ïoh ban thep 11 kol. U la ïadon bynta ban khur jingjop ha ka sien kaba ar ha ka World Cup ha u 2018 ha Russia.
Lah ban pynkynmaw ba ha u Nohprah mynshem snem, u manager ka France u Didier Deschamps u la pynpaw, “Nga ïeit ïa baroh ki rangïalehkai jong nga, hynrei nga sngewsih halor u Paul u bym shym la ïoh ban ïalehkai na ka daw ka jingmynsaw.”
Hashwa ba un leit phai biang sha ka Juventus, u Pogba u la pynlut ïa ka por ïalehkai haduh hynriew snem bad ka Manchester United. Kane ka klob ka la pynlong ïa u kum u rangïalehkai ba rem dor hapoh ka lympung ïalehkai ha England ha kaba u la ïoh ïa ka jingsiew kaba £89m ha u 2016.
Utei u rangïalehkai uba la ïoh ban ïalehkai 226 sien bad thep 39 kol, hynrei um shym la lah ban ïalehkai bha kumba ka klob ka la angnud ïa u naduh ba ka la wanrah sha Old Trafford.
Ha kaba ïadei bad kane ka jingshah sospon, u Pogba u la khmih lynti ban buh ka jingkyrpad hapoh ka ïingshari jong ka Court of Arbitration for Sport.
