Shillong, Rymphang 29
Ka Chandigarh University ka la long ka lahduh ha ka 4th Khelo India University Games 2024 hadien ba ïoh khur haduh 71 tylli ki takma ha kane ka lympung kaba la poi sha kaba kut ha ka Sngi Palei ha Guwahati, Assam.
Kane ka skulbah ka la lah ban khur 32 tylli ki takma ksiar, 18 tylli ki takma rupa bad 21 tylli ki takma rnong na ka bynta ban bat ïa katei ka kyrdan ba hakhlieh.
Ïa kane ka lympung ïalehkai kaba la sdang naduh 17 tarik mynta u bnai, la pynhap pyrda noh da ka Myntri ka tnat ïalehkai ka sorkar Assam ka Shrimati Nandita Gorlosa ha ka sngi Palei ha Sarusajai Sports Complex.
Ha kane ka sngi kaba khatduh, ka Chandigarh ka la ïoh ban khur ïa ka takma ksiar lyngba u Vikash (Men 51-54kg), Harsh (Men 57-60kg), Deepak (Men 60-63.5kg), ka Priya (women 54-57kg) bad ka Pranjal (women 66-70kg).
Ka Lovely Professional University ka la wan ha ka kyrdan ba-ar da kaba khur 20 tylli ki takma ksiar, 14 ki takma rup bad 8 ki takma rnong, katba ka Guru Nanak Dev University ka la wan balai da kaba khur 12 tylli ki takma ksiar, 20 ki takma rupa bad 19 ki takma rnong.
Ka lahduh jong u snem ba la dep ka Punjab University ka la wan basaw hadien ba ïoh khur mar 12 tylli ki takma ksiar bad rupa lem bad 16 ki takma rnong. Kane ka skulbah hynne ka sngi ka la lah ban khur 5 tylli ki takma ksiar, 2 ki takma rupa bad 3 tylli ki takma rnong ha ka boxing kaba la long ha Gangtok, Sikkim, katba ïa ka kynhun jong ki kynthei la pynlong ha Nehru Stadium, Guwahati.
Ka Jain University kaba la lam khmat kham hashwa lyngba ka jingïoh khur takma na ka jngi bad ïakop mareh, ka la hiar sha ka kyrdan basan da kaba khur 12 tylli ki takma ksiar, 7 ki takma rupa bad 6 ki takma rnong.
Ka Chandigarh University kaba la bat ïa ka nam lahduh, ka la khur haduh 7 tylli ki takma ksiar na ka wrestling, 8 ki takma na ka athletics, 3 ki takma na ka weightlifting bad swimming, katba 2 takma na ka fencing bad mar 1 na ka kabaddi, rugby, judo bad badminton.
Kumba ka paw ka Chandigarh University ha ka lympung ïalehkai kaba la pynlong nyngkong ha Odisha ka la wan ha ka kyrdan ba 34 bad ha ka sien kaba ar kaba la wan ba 20 bad ha ka sien kaba lai kaba la long ha Lucknow ha kaba ka la wan ha ka kyrdan ba khadwei.
Haba pynpaw halor kane ka jingkiew kynsan katei ka skulbah, u Co-ordination Manager u Dr Mahesh Jaitely u la ong ba kane ka jingkiew ka dei lyngba ka jingpynkylla ha ka ‘sports policy’ ha kaba ka skulbah ka la sdang ban nangïai kiew shaphrang. “Ngi la pynlut ïa ka pisa lyngba ka bam kaba tei ïa ki nongïalehkai bad ngi la kyntiew ruh ïa ka khusnam pisa na ka bynta ki nongjop kiba khur takma,” u la bynrap.
