Shillong, Rymphang 29
U Cristiano Ronaldo u la shah sospon na ka bynta kawei ka jingïalehkai halor ka jingkynnoh ba u la pyni dak da ka shynriah kti hadien ba ka Al Nassr ka la jop 3-2 kol ïa ka Al Shabab, la pynbna ka Disciplinary and Ethics Committee jong ka Saudi Football Federation (SAFF) ha ka Sngi Balang.
Hadien ba la kut artad ka jingïalehkai ha ka Sngi U Blei, la saphriang ki dur jong u Ronaldo ha social media ba u pynshah ïa la ka shkor bad hadien kata u la pynkhih ïa la ka kti ha kum ka dak khlemakor hakhmat ki nongkyrshan ka Al Shabab.
Katei ka komiti ka la daiñ kuna ïa utei u khlur ïalehkai ka Portugal haduh 10,000 riyals ($2,666) ha kaba un hap ban siew sha ka synjuk ïalehkai Saudi Football Federation bad 20,000 riyals sha ka Al-Shabab. Kane ka rai jong ka komiti ka long kaba khatduh bad ym lah ban buh ka jingkyrpad.
Kane ka long ka sien ba ar ba u Ronaldo u la leh ïa kane kajuh ha u Ïaïong mynshem snem ha kaba u la pyni ïa kajuh ka dak ha ka jingïakhun pyrshah ïa ka Al Hilal, ha kaba ka Al Nassr ka la jop da 2-0 kol.
