Florida, Rymphang:
Ha kane ka khubor la ong ba ka long kaba sngew shyrkhei ba wat ki kmie-ki kpa ki nud ban shim ia ka jingim jong ki khun ha kine ki sngi ba mynta. Ha kane ka jingjia la ong ba ki pulit ki la iohi bad ïohsngew lyngba ki kor ki bor bad ki CCTV Camera ba la pyndait ha ka jaka ba uwei u rangbah u don, ha kaba la ïohsngew ia utei u rangbah ba u la ai dak bad pyntip ia ka kurim ba u la dep siat iap ia la u khun hapdeng ka jing-iakynad bad jingiania bad utei u khun uba dang 22 snem ka rta ba la ju tip kum u Eric. Kane ka la jia ha ka jaka sah jong katei ka longïing hapoh ka nongbah Miami ha u Naiwieng mynshem snem.
La ong ba ha katei ka jingjia, ki pulit ki la ïohsngew ia ka jingkren jong utei u rangbah uba la iathuh ia ka kurim ba u khun jong u, um shym ring mynsiem shuh bad u la iap “He’s not breathing, He’s Dead”. Kine ki long ki kyntien kiba utei u rangbah u la iathuh ha ka kurim jong u ha katei ka por ba la iohi ba u leit ban ñion ia ka ‘bell’ ha ka jingkhang iing lajong ban pyntip ia ka kurim ba u khun jong ki u la iap bad ba dei ma u hi uba la dep siat iap ia u. Bad kane ka la jia ha ka 3 tarik jong utei u Naiwieng 2023.
La ong ba ha katei ka dur khih ba la ioh ring na ka camera ba la pyndait ha katei ka iing, la ïohsngew ia utei u rangbah ba u la bthah ia ka kurim jong u ban phone bad pyntip sha u hynmen jong u bad ba katei ka kurim ka la hylla bad ong ba un poi sha patok khlem pep namar katei ka jingleh jong u. Hynrei utei u rangbah u la jubab ia ka kurim jong u bad ong ba kam dei ka jingbakla jong ka, kumta kam dei ban sheptieng hynrei ka dei ban pyntip sha u hynmen jong u mar-mar.
Ki pulit haba ki la leit poi sha katei ka iingsah jong kitei ki shi- iing, ki la shem ia u Eric, uba long u khynnah pule jong ka Florida International University bad ba u la thiah iap ha madan ha ryngkat ki dak mong kuli.
Haba iadei bad kane, la ong ba utei u rangbah u la shah bat noh ha ki pulit tad haduh ban da dei ka por ban pynsngap ia katei ka mat hakhmat ka ïingbishar ha une u Lber 2024.
