Shimla, Rymphang:
U Lamphang jong ka Himachal Pradesh Assembly u Kuldeep Singh Pathania hynnin ka sngi u la weng noh ïa 6 ngut ki MLA jong ka Congress kiba la pyrshah ïa ka mon jong ka seng ban ‘vote’ katkum ka jingkwah jong ka sorkar halor ka Finance Bill hapoh ka ïingdorbar.
Kine ki MLA kiba la shah weng ki kynthup ïa u Rajinder Rana, Sudhir Sharma, Inder Dutt Lakhanpal, Devinder Kumar Bhutoo, Ravi Thakur bad Chetanya Sharma.
Ha ka jingai jingkren sha ki nongthoh khubor ha Shimla, u Pathania, uba la buh shwa halor ka rai ban beh ïa kine ki MLA ha ka sngi Balang, u la ong ba kine ki MLA ki la long pyrshah ïa ka kyndon ha kaba ki la pyrshah ïa ka rai jong ka seng Congress naba ki la shahjied na ki tiket jong ka seng.
“Kine ki 6 ngut ki MLA kiba la shah beh bad shah khang ban long ki dkhot jong ka Himachal Pradesh Legislative Assembly naduh ka tarik ba la buh hukum,” la ong u Lamphang. Kine ki MLA ki la ïaid lait na ka Vote katkum ka jingkwah jong u kyrtong ka seng BJP u Harsh Mahajan ha ka jingïakhun ïa ka ilekshon Rajya Sabha ha ka sngi Ba-ar.
