Shillong, Rymphang 29
U nongtied ba kynsai ka India u KL Rahul uba la khmih lynti ban ïoh shim bynta ha ka jingïalehkai Test kaba san, un duh ïashim bynta ha kane ka jingïakhun kaba khatduh ka ban long ha Dharamsala.
Kat kum ka kyrwoh ba la pyllait da ka BCCI la ong ba ka kynhun ki nongsumar jong kane ka kynhun ka dangbishar bniah na ka bynta jong u ryngkat bad kiwei pat ki nongsumar ha London halor ka jingmynsaw ka jong u.
Ha kajuh ka por kane ka synjuk ïalehkai ka ri ka la pynthikna ba u Jasprit Bumrah ïa uba la pyllait noh ha ka jingïalehkai Test kaba saw kaba la long ha Ranchi, un ïasoh lang bad ka kynhun ha kane ka jingïakhun kaba khatduh ka ban long ha Dharamsala.
Shuh shuh la ong ba u Washington Sundar uba uba la pyllait noh na ka kynhun bad un ïasoh bad ka Tamil Nadu na ka bynta ka jingïalehkai semi final jong ka Ranji Trophy pyrshah ïa ka Mumbai kaba la thmu ban long ha ka 2 tarik u Lber. Te kumta une u rangïalehkai un sa ïasoh lang bad ka kynhun hadien ba la kut ka jingïakhun semi final.
Ki khubor ki ïathuh ruh ba u Mohammed Shami uba la shah sumar ha ka 26 tarik mynta u bnai bad uba la koit na ka jingmynsaw ka kjat, shen yn ïasoh sha ka National Cricket Academy (NCA) ha Bengaluru na ka bynta ban long ba la pynkhreh ïa lade.
Ki rangïalehkai ka India na ka bynta ka jingïalehkai Test kaba san ki long u Rohit Sharma (C), Jasprit Bumrah (VC), Yashasvi Jaiswal, Shubman Gill, Rajat Patidar, Sarfaraz Khan, Dhruv Jurel (WK), KS Bharat (WK), Devdutt Padikkal, R Ashwin, Ravindra Jadeja, Axar Patel, Kuldeep Yadav, Mohammed Siraj, Mukesh Kumar bad u Akash Deep.
