Shillong, Rymphang 29
Ka Shillong Sports Association (SSA) ka la pynshai ba ka jingïalehkai kaba nyngkong ha ka lympung ïalehkai Shillong Premier League 2023-24 kan long hapdeng ka Nongthymmai pyrshah ïa ka Rangdajied United FC ym kumba ka la pynbna kham hashwa.
Katei ka jingïakhun kan long ha ka 15 tarik u Lber bad ka ban dei ruh artad ka sngi sdang jong kane ka lympung.
Ha ka jingshisha ïa kane ka lympung la dei ban pynlong mynshem snem, hynrei na ka daw ka jingbym ïoh madan la hap ban pynsangeh.Pynban mynta ka kynti ka SSA ka la ïoh ïa la ka jong ka madan ïalehkai kaba paka ha SSA Stadium (1st Ground).
Kat kum ka bhah na kane ka lympung ki don haduh saw tylli ki kynhun ki ban ïoh rung sha ka Meghalaya State League ïa kaba ka Meghalaya Football Association kan sa pynlong mynta u snem.
