Shillong, Rymphang 29
Ka Wrestling Federation of India (WFI) ka la long ba la kloi ban pynlong ïa ka prokram kilanmet na ka bynta ki nongïalehkai (senior) ha ki 15 bnai bad ka Delhi ka lah ban shimti noh ha ka jaka ka Patiala hadien ka jingpyrshah ïa katei ka synjuk ïalehkai jong ka ri.
Hadien katto katne bnai ba la shah sospon u nongïalam ka WFI u Brij Bhushan Singh, uba la shah kynnoh ba u la jrong kti ïa ki ‘thei ïalehkai ha ka prokram kilanmet. Ïa kane ka synjuk la hap ban pynïaid da ka ad-hoc panel na ka bynta ki prokram kilanmet jong ki shynrang kaba la long ha Rohtak bad na ka bynta ki kynthei kaba la long ha Patiala.
Kham hashwa na ka liang ka United World Wrestling (UWW) ka la weng noh ïa ka sospon pyrshah ïa ka WFI hadien ba u Sanjay Singh u la shah jied kum u president uba thymmai, la pynbna ka WFI ba ïa ka jingpyrshang ban jied ïa ki nongïalehkai na ka bynta ka Asian Wrestling Championships ka ban sdang naduh 11 haduh 16 tarik u Ïaïong ha Bishkek bad ka Olympic Qualifier ka ban long naduh 19 haduh 21 tarik u Ïaïong.
“Hadien ba la lah ban pynlong ïa kine ki jingpyrshang, ki saw ngut kiba la wan ha ki kyrdan basaw ha la ki jong ki kyrdan la khot sngewbha ïa ki sha ka prokram kilanmet jong ka ri,” la ong u president ka WFI u Sanjay Singh da kaba bynrap ba ka synjuk ka la dep ban pynkhreh ïa ka jaka na ka bynta katei ka prokram kilanmet.
Na ka daw ka jingïakhih pyrshah ha ka bynta kaba shaphang shatei jong ka ri, ia ki shlem ai jinghikai jong ka SAI ha Sonipat yn pynlong kum ki jaka kilanmet, katba ïa ka IG Stadium yn pynlong ïa ka prokram kilanmet na ka bynta ki kynthei.
”Ka SAI centre ha Lucknow kan long shabar, hynrei ngi la jied hapdeng ka Patiala bad ka Delhi. Te kumta ngi lah ban kyrpad ïa ka sorkar ba kan pynbiang ïa ka IG Stadium kum ka jaka kilanmet na ka bynta ki kynthei,” la ong ka WFI.
