Kolkata, Rymphang:
U nongïalam jong ka seng Trinamool Congress u Sheikh Shahjahan, uba la shah kynnoh donkti ban tuh jaka bad ka jing-leh be-ijot ïa ki longkmie na Sandeshkhali kaba don ha West Bengal, u la shah phah kumba 14 sngi na ka bynta ka jingshah tohkit ha ki pulit da ka ïingbishar ha Basirhat hynnin ka sngi.
Kumba la ïathuh ka tyllong khubor, la ong ba ki pulit ki la kwah ban set 14 sngi ïa u Shahjahan, uba la ïaidlait na ki kti jong ka aiñ da palat 50 sngi.
U Shahjahan, uba la shahkem hynnin ka step, jong ka sngi Palei, u la pynpaw ïa ka durkhmat kaba um don jingsngew ei ei haba u rung hapoh ka ïingbishar bad u la pyni ïa ka dak ka jingjop sha ki nongthoh khubor.
Kum shi bynta ban kren ei ei halor ka jingshahkem jong u, u nongïalam jong ka liang pyrshah bad u MLA jong ka seng Bharatiya Janata Party (BJP) u Suvendu Adhikari u la pynshisha da kaba ong ba ki pulit ki la tip shano ba u Shahjahan u don, ki la leh mynleh kem ïa u tang ban pynhun ïa ka jingdawa.
“Kane kam dei ka jingkem ïa u hynrei ka dei ka jingpyndep rukom. Katba ki kynhun tohkit jong ka sorkar kmie kim kem ïa u, ki briew jong ka Sandeshkhali kin ym ïoh ïa ka jingbishar bahok,” la ong u Adhikari.
