Shillong, Lber 01
Ka kynhun ki ‘thei ïalehkai U-16 ka ri India ka la sdang ïa ka jingïaid lynti da ka jingjop ha ka lympung SAFF U-16 Women’s Championship, hadien ba ka la lah ban pynjem khnap ïa ka Bhutan haduh 7-0 kol ha ka Sngi Thohdieng ha ANFA Complex, Lalitpur, Nepal.
Ha kane ka jingïakhun kaba nyngkong, ka ‘thei ïalehkai ‘dien ka Jylla ka Bonifilia Shullai ka la ïoh ban mih madan na ka bynta kane ka kynhun hapoh ka jingïalam u Biby Thomas Muttath (coach).
Naduh kaba sdang jong ka jingïalehkai, kane ka kynhun ïalehkai ka ri ka la lah ban ïalehkai bha bad ban pynpaw ïa ka jingtbit ha kaba ka la ïoh ban thep haduh hynriew kol tang ha ka kylla step.
Ka ‘thei ïalehkai kaba dang 13 snem ka Hazaribagh ka Anuksha Kumari, kaba la ïoh ban thep haduh 22 kol ha ka Sub-junior (tier 1), ka la lah ban pynpra ïa ki nongïalehkai ‘dien ka Bhutan bad ka la lah ban khur syndon da ka hat-trick hadien ba ka la ïoh ban thep kol ha ka minit kaba 17′, 27′ & 40’.
Kham hashwa tang mar ïasdang ka jingïalehkai ka Shveta Rani ka la ïoh ban pynkhih jar nyngkong eh ha ka minit kaba 6′, katba ka ‘thei ïalehkai shakhmat ka Pearl Fernandes ka la ïoh ban thep ar kol ha ka minit ba 13′ & 26’.
Hadien katto katne por ba la bteng ïa ka jingïakhun jong ka kylla miet, ka India ka la pynbud biang sa shi kol lyngba ka Anwita Raghuraman ha ka minit kaba 61 na ka bynta ban tam haduh 7-0 kol.
Kane ka lympung kaba don saw tylli ki kynhun kynthup lang ïa ka Nepal kaba ïoh ban pynlong ïa kane lympung lem bad ka Bangladesh. Kumta ki kynhun kiba wan ha ki kyrdan ba hakhlieh kin ïoh rung sha ka final bad ban ïaknieh ïa ka nam lahduh ha ka 10 tarik mynta u bnai.
Kumba ka paw ha ki snem kiba la leit, ka Bhutan ka la long ka kynhun kaba kynsai ha ka SAFF, hynrei ha kane ka jingïakhun kam shym la lah ban ïalehkai bha pyrshah ïa ka India.
Lyngba kane ka jingjop, ka India kan pynkhreh ïa ka jingïakhun kaba ar pyrshah ïa ka Bangladesh ha ka 5 tarik bad ïa ka Nepal ha ka 7 tarik.
