Hyderabad, Rymphang:
U Myntri ka sorkar kmie uba dei khmih na ka bynta ka Road Transport & Highways u Nitin Gadkari u la ong ba ki briew ha kylleng ka ri ki la pyni ïa ka dak jong ka jingïeid bad ka jingsngewktah bad kumjuh ka jingsngew shaniah ha ka seng BJP, ha kaba u la ngeit skhem ba kane kan sa ïarap ïa ka seng ba kan sa ïoh ïa ka jingjop ha palat 400 tylli ki konstitwensi ha ka jingïakhun ïa ka ilekshon Lok Sabha.
Ha ka jingai jingkren ha ka jingïalang paidbah ba la pynlong ha ka Collectorate Grounds barim ba don ha Nizamabad ha por ba don ka Vijay Sankalpa Yatra jong ka seng BJP, u la ong, “Ka seng BJP ka la long tang ma ka hi ka seng kaba la buh ïa ka ri ha ka roi ka par. Ka la kdew shai ba ka la thmu ban buh ïa ka ri ha ka kyrdan kaba lai ha kaba ïadei bad ka jingkiew ha ka ïoh ka kot ha ka pyrthei.”
“Ki jingpyntreikam ha kaba ïadei bad ka roi ka par ka la sdang naduh ka sorkar jong u Atal Bihari Vajpayee. Ka jingpyrkhat jong u Narendra Modi ka la nang ïai bteng na ka bynta ban wanrah ïa ka roi ka par kum ka mat kaba kongsan. Phi la ïohi ïa ka jingpyntreikam bad ka jingkiew jong ka ri ha kaba la sakhi ha ki 10 snem ba la leit. Kumta sa shisien sa ai jingkyrshan na ka bynta ka seng BJP,” u la ong.
