Shillong, Lber 01
Kan long ka sien kaba nyngkong eh ïa ka thaiñ Ri Bhoi District ba kan ïoh ïa ka madan ïalehkai ka ban siang da u phlang plastik (artificial turf) ha ka shnong Umbuda kaba don ha Nongpoh.
Ïa kane ka madan ka ban sa sdang treikam noh shen yn pynlong shwa da ka jingbuh ïa u maw nongrim ha ka 5 tarik mynta u bnai da u Myntri Rangbah ka Jylla u Conrad K. Sangma lem bad u Myntri ka Sports and Youth Affairs u Bah Shakliar Warjri.
Kane la wan hadien ba na ka liang ka Sorkar ka la mang pisa na ka bynta ban sdang noh ïa katei ka jingtei. Dangshen ruh ha ka Dorbar Mang Tangka na ka liang u MLA ka Nongpoh Constituency u Bah Mayralborn Syiem u la ai khublei ïa ka Sorkar Jylla halor ka jingmang pisa na ka bynta ban tei ïa ka madan. “Nga ai khublei ïa u Myntri Rangbah ka Jylla u Conrad K. Sangma kumjuh ïa u Myntri ka tnat ïalehkai u Bah Shakliar Warjri halor ka jingmang pisa na ka bynta ban tei ïa ka madan phlang plastik (artificial turf) ha ka shnong Umbuda kaba ha Nongpoh,” la pynpaw u Bah Mayralborn dangshen hapoh ka Ïingdorbar thawaiñ.
Kum ka jingpynkhreh ïa kane ka jingwan buh maw nongrim, na ka liang utei u MLA ka thaiñ ryngkat u District Sports Officer (DSO) u Bah Bobby L. Nongbet lem, ki nongtrei kane ka shlem treikam, ki nongkitkam shnong jong ka Umbuda ki la leit jurip ïa katei ka madan ha ka sngi Thohdieng.
Lah ban pynkynmaw ba ki ar tylli ki projek ban siang phlang plastik kiba la wan lyngba ka skhim Khelo India lyngba ka sorkar pdeng ki la wan sha kane ka thaiñ kata ha madan kaba ha Umsning bad ha madan Kurkalang, hynrei kine ki dangsah teng haduh mynta naduh ba ki la ïoh ka jingmynjur ha u snem 2022.
Lah ban ong ba kane ka jingbym lah ban pynurlong ïa kine ar tylli ki projek ki lah ban dei na ka daw ka jingbym shim khia da ki bor ba dei khmih jong ka Sorkar Jylla bad ruh ki nongmihkhmat na kine ki ar tylli ki constituency.
