Shillong, Lber 01
Wat hapdeng ka jingbym lah ban ïalehkai ha ki khyndiat bnai ba dep, u Andy Murray u dang ïai khmih lynti ban khur ïa ka takma ksiar kaba lai ha ka Olympic ka ban long ha Paris mynta u snem.
Une u rangïalehkai na England ba la 36 snem ka rta uba la lah ban khur jingjop ar sien ha ka Olympic, u la ïakynduh jingeh ban khur jingjop namar kumba ka long mynta u la don ha ka kyrdan ba 67 ha ka pyrthei.
U Murray uba la shah rem hynriew ha ki jingïalehkai ba la lah, u la lah ban wanphai da ka jingjop ïa u Alexandre Muller ha Doha. Hynrei ha ka sngi Balang une u rangïalehkai u la pynpaw ba un ïai bteng ban ïalehkai bha hashwa ban jam sha katei ka lympung ka ban long ha ka por lyiur.
Hapdeng ki jingeh kiba bun pynbna u Murray u dangïai khmih lynti ban wanphai sha ka Paris Olympics na ka bynta ban pynurlong ha ka ban khur sa kawei pat ka takma ksiar.
“Nga kyrmen ba nga lah ban ïoh ïa ka kabu kaba biang ban ïashim bynta sa shisien pat,” la pynpaw u Murray ha kawei ka prokram jong ka BBC Radio Four kaba la long ha ka sngi Balang halor ka jingkylli la u lah ban ne eh ban mihkhmat ha ka Paris Olympics.
U Murray, uba la bat lai sien ïa ka nam lahduh ha ka Grand Slam bad uba long u nongjop ha ka jingïakhun para marwei ban khur ïa ka takma ksiar ha London ha u 2012 bad ha Rio de Janeiro ha u 2016, u la don hapdeng ka jingeh ba u lah ban duh ïa ka lad na ka bynta ka jingïakhun para marwei ha ka Paris Olympics lada ka kyrdan ka jong u ka danghiar arsut.
Kumba ka long mynta une u rangïalehkai u la don ha ka kyrdan ba 67 ha ka pyrthei, te kumta u Murray u lah ban ïakynduh jingeh ban nangkiew shaphrang ha ka kam ïalehkai jong u.
Ka Wimbledon kan long ka lympung ïalehkai kaba kham eh na ka bynta u Murray namar ym lah ban pynthikna la u danglah ne em ba un wanphai da ka jingkhlaiñ bor ha ka kam ïalehkai jong u.
Dangshen u Murray u la lah ban khur jingjop hadien ba u la lah ban pynliem ïa u Denis Shapovalov ha ka Dubai Championships hynrei hadien u la shah rem noh ha u Ugo Humbert uba na France ha ka sngi Balang.
Une u rangïalehkai u la pynpaw ïa ka jingkhmih lynti ban wanphai da ka jingkhaiñ bor ha Wimbledon bad kumjuh na ka bynta ka Paris Olympics.
