Shillong, Lber 01
Shisngi hadien ba ka Khasi Students’ Union (KSU) Laban Circle ka la dep shna ïa kawei ka ïing ha Maxwelton Estate kaba hap ha Kench’s Trace Oxford Hill & Rilbong bad kaba don harud surok, na ka liang ki samla pule bad ki longïing baduk ki la wan shakhmat ba ki kwah ban sah ha katei ka ïing kaba dang shu dep shna.
Haba buddien halor kane, la ïoh ban ïakren bad u President ka KSU Laban Circle, u Rueben Najiar, u la ïathuh ba ki la don ki samla pule bad ki longïing baduk kiba la wan ban pan ban sah ha katei ka ïing hynrei kum ka seng ka hap ban da bishar shwa ban ai ban phah sah bad kan dang shna biang ïa ki ïing nangne shakhmat.
U la ïathuh ba ha ka jingïakynduh bad ka Deputy Commissioner ka East Khasi Hills, Kong RM Kurbah ha ka 29 tarik Rymphang, ka la ïathuh ba kam don ki thup kyrteng jong ki ïing bar jylla kiba sah ha katei ka jaka namar ka hap ha ka Land Revenue hynrei ka la kular ba kan thoh shithi sha ka tnad Municipal ban khang noh ban ri masi namar ki pyntuid ïa ki jaboh sha ki wah.
Nangta, u la ïathuh ba ki don palat 20 tylli ki ïing na ki 70 tylli kiba sah ha katei ka jaka sorkar kiba im da kaba ri masi.
“Ngi la dawa na ka DC ba ka dei ban kyndang beit ïa kito ki briew kiba sah be-aiñ, hynrei ka DC ka la jubab ba kane ka dang hap ha mukotduma hynrei ka la kular ban phah khang tang ïa kito ki longïing kiba ri masi” u la ong.
U la pynpaw ba lada ka shlem treikam jong ka DC kam don ïa ki kyrteng jong ki ïing bad ki briew kiba sah kan don jingma namar lada mih ki jingsniew yn nym lah ban tehlakam. Kum ban shu pynkynmaw, ka KSU Laban Circle ka la leit shna ïa ka ïing kaba ker da ka tin harud surok ha Maxwelton Estate ha ka step jong ka 29 tarik u Rymphang ban phah sah ïa ki para Khasi ki bym don ïing.
Haba buddien ïa kane ka ïing la ïohi ba ki jingthoh kiba la wah harud surok ki don kiba la kyllon bad ka ïing la khang tala.
