Shillong, Lber 01
Ka Awaken India Movement (AIM) Meghalaya Unit ha ka Sngi Thohdieng ka la leit ban ïakynduh ïa u Principal jong ka St. Anthony’s College halor ka jingpynmih jingthoh jong ka kolej ba ki khynnah pule ki dei ban don ïa ka Aadhaar Card lym kumta kim lah satia ban thoh ïa ka eksam.
U Chairman jong ka AIM, Bah Banshai Marbaniang, u la ong ba ka jingwan ïakynduh jong ka kynhun ïa u Principal ka kolej ka dei halor ka jingeh kaba ki khynnah pule jong katei ka kolej ki la ud la nam bad ïakynduh tang namar ka jingbym don jong ki ïa ka Aadhaar Card.
U la ong ba kane ka jingphah leh Aadhaar Card ïa ki samla pule kam dei satia kaba la phah tang napoh ka St. Anthony’s College hynrei wat napoh ka Nongstoiñ College, Nongpyndeng ruh ka la mih ka jingujor lyngba ki khynnah pule katei ka kolej ba ki hap ban leh ïa ka Aadhaaar Card lym kumta kin duh ban thoh eksam.
U la ong ba kum ki kolej kim dei ban pynbor ïa ki khynnah pule ba kin pyndonkam ïa u Aadhaar Card hynrei kaei-kaei baroh ka shong ha ka mon ba laitluid jong ki.
“Ka mon jong ki ka long ba kin wanrah ïa u Aadhaar lada ki la don ïa u Aadhaar bad lada kim pat don ruh, ym dei ban pynbor ïa ki bad ong ba lada kim leh ïa u Aadhaar kin duh ban thoh ïa ka eksam”, la ong u Bah Marbaniang.
Nalor nangta, u Bah Marbaniang u la ong ruh ba na ka liang ka kynhun kan sa leit ban ïakynduh ïa u Vice-Chancellor ka North Eastern Hill University (NEHU) ban kylli halor kano ka aiñ bad kyndon ba na ka liang jong kane ka skulbah ka la pynmih ïa kane ka jingthoh na ka bynta ban byrngem ïa ki khynnah pule ba kin duh ka lad ban thoh ïa ki eksamin jong ki tang namar ba kim don ïa ka Aadhaar Card. Shuh shuh u Bah Marbaniang u la byrngem tyngeh ruh da kaba u la ong ba lada na ka liang jong ki kolej bad ka skulbah ki pynbor ïa ki khynnah ban leh ïa ka Aadhaar Card, na ka liang ka kynhun kan dawa shisyndon ban pynsangeh noh ïa kino-kino ki eksamin kiba don hapoh ka jylla.
“Yn nym dei shuh ba ngin pynlong ïa ki eksamin namar ka Supreme Court ka la dep ong lypa ba u Aadhaar um dei uba kongsan ban pyndonkam ha ki UGC, NEET lane ha ki CBSE Course na ka bynta ban ïaleh ïa ki eksam”, la ong u Bah Marbaniang.
U Bah Marbaniang u la ong ba lada na ka liang ki jaka pule ki don kano-kano ka jingïohnong lane ki khynnah pule ki dei ban ïoh ka jingïohnong na ka bynta ban pyndonkam ïa ka Aadhaar Card, ki dei ban pynshai sha ki khynnah pule ym ba kin buhrieh ïa kine kiei-kiei namar kane kam dei ka kam kum ka khaïi ka pateng jong ki jaka pule.
“Ka kolej kam dei ban buhrieh ïa kiei-kiei baroh khoit hynrei ka dei ban pynshai lut sha baroh ym ban pyndonkam kum ka khaïi ka pateng namar lada ki leh kumta, ngin ujor syndon shapoh ka High Court ne sha ka Supreme Court ba dei ban khang shisyndon ïa ki kolej bad ban khang shisyndon ïa kano-kano ka eksam kaba ki khynnah ki dei ban ïaleh bad ym dei shuh ban pynlong ïa ki eksam”, la ong u Bah Marbaniang.
Na ka liang ka kynhun kan sa leit ruh ban buh da ki jingthoh ha u Myntri ka tnad pule puthi ka sorkar jylla, u Rakkam A. Sangma halor ka jingbym kren eiei jong ka tnad halor kane. Pynban na ka liang ki jaka pule ki la shu pynmih kynsan ïa kane ka jingbthah bad byrngem ïa ki khynnah pule ba kin duh ban thoh ïa ki eksam jong ki lada kim don ïa ka Aadhaar Card. Na ka liang katto-katne ki khynnah pule jong ka St. Anthony’s College ki la pynpaw ba kane ka jingbthah jong ka kolej ban leh ïa ka Aadhaar Card na ka bynta ba kin ïoh ïaleh ïa ki eksam jong ki ka la long pynban kum ka jingshah pynbor bad ym tang katta hynrei ka la buh jingeh shikatdei ruh ïa ki.
