Shillong, Lber 01
Ka kynhun ïalehkai ka Jylla ka la ïasam biang mar shi point ha ka sien ba lai jong ka lympung 77th National Football Championship na ka bynta ka Santosh Trophy 2023-24, hadien ba ka la ïakhaid mar 2-2 kol pyrshah ïa ka Arunachal Pradesh ha ka Sngi Thohdieng ha Itanagar.
Kane ka kynhun hapoh ka jingïalam u Khlaiñ Pyrkhat Syiemlieh ka la ïoh 3 point na ki san sien ïakhun na ka bynta ban ïai sah ha ka kyrdan basan napdeng ki hynriew tylli ki kynhun kiba don ha ka Group-A bad ïa ka kyrdan ba khatduh la bat da ka Arunachal Pradesh (2 point).
Kumta ka Meghalaya kaba la wan ba-ar ha u snem ba la dep, ka la duh noh ïa lad ban jam sha ka quarter final ha kane ka kynti kaba mynta.
Ha kane ka jingïakhun u coach ka kynhun u la sei madan ïa hynñiew ngut ki rangïalehkai kiba la shah pynshongben. Kine ki kynthup ïa u rangapkol u Siwel Rymbai, u Babysunday Marngar, Lukas Syngkli, Baiaikara Swer, Dameki Khongstia, Chesterpaul Lyngdoh bad u Shaiborlang Kharpan. Hynrei u la pynshong noh ïa uwei pat u rangapkol u Lionel Daryl Rymmei, kumjuh ïa u Wanboklang Lyngkhoi, Damonlang Pathaw, Dawanchwa Challam, Nikelson Bina, Kitboklang Pale bad u Nelson Rymbai.
La ong ba tang mar ïa sdang ka jingïakhun, ka Meghalaya ka la ïoh ban pynkhih jar nyngkong eh lyngba u Chesterpaul ha ka minit kaba 8. Hadien katto-katne por ka Arunachal ka la lah ban pynphai kylla lyngba u Tarh Dolu ha ka minit kaba 22 na ka bynta ban ïakhaid mar shi kol.
Hadien ba la bteng ïa ka jingïakhun jong ka kylla miet, ka Arunachal ka la ïoh ban thep biang sa shi kol lyngba u Rahul Goju Singpho ha ka minit kaba 56. Hashwa ban wan ka Meghalaya ka la lah ban pynphai kylla lyngba ka penalty. Kane ka la wan hadien ba u Kitboklang u la shah pynur ha u rang-apkol ka liang pyrshah bad dei hangne ba u Sheen Stevenson Soh-ktung um shym la pynlehnohei ïa kane ka kabu ksiar ha ka minit kaba 82 na ka bynta ban pynïa-khaid mar 2-2 kol.
