Nongstoiñ, Lber 01
Ha ka Sngi Thohdieng, uwei u rangbah u la khlad noh ha shen hadien ba ka thuk-thuk kaba u ñiah ka la leit rung shapoh khrum jong kawei ka trok kaba don ïa u nombor ML-06-A-2572.
Ka tyllong khubor na u Superintendent of Police ka West Khasi Hills, ka ong ba katei ka jingjia ka la jia ha kawei na ki jaka ha ka dong Mawïaban jong ka shnong Siejlieh, West Khasi Hills ha HP Petrol Pump, Mawïaban kaba don harud ka surok Nongstoiñ-Riangdo.
Ïa katei ka trok la ñiah da u Obarlin Sohshang na ka shnong Mawsaw, West Khasi Hills bad ka tyllong khubor na u SP ka ïathuh ruh ba katei ka thuk-thuk ka dei kaba don ïa u nombor ML-06-4170.
Ka tyllong khubor na u SP ka ong ruh ba ïa utei u rangbah uba la khlad u dei ba la tip kyrteng kum u Bah Phrailannes Nongsiej (54 snem ka rta) na ka shnong Mawranglang, SWKHD uba ñiah ruh ïa ka thuk-thuk.
Shuh shuh ka khubor ka ong ba halor katei ka jingjia ka jingtohkit na ki pulit ka dang ïaid shakhmat.
