Shillong, Lber 01
Ka Services ka la ïoh ban bat ïa ka kyrdan ba hakhlieh duh jong ka Group-A ha ka Santosh Trophy, hadien ba kane ka kynhun kaba la bat teng ïa ka nam lahduh ka la ïakhaid mar 1-1 kol pyrshah ïa ka Kerala ha ka sngi Thohdieng ha Golden Jubilee Stadium kaba ha Itanagar. Ha kane ka lympung, ka Services ka la ïoh 10 point na ki san sien ïakhun napdeng ki hynriew tylli ki kynhun jong kane ka group, katba ka Kerala ka la ïoh 8 point na ka bynta ban wan ha ka kyrdan balai.
Ïa kine kol la lah ban thep ha ka kylla step. Ka Kerala ka la ïoh ban pynkhih jar nyngkong eh ha ka minit kaba 22. Hashwa ban kut ka jingïalehkai jong ka kylla step, ka Services ka la lah ban pynphai kylla ha ka minit kaba 45+4 lyngba u Samir Murmu.
Ka Goa kaba la wan ha ka kyrdan ba-ar ha ka Group-A hadien ba ka la lah ban ïakhaid mar 3-3 kol pyrshah ïa ka Assam. U Delton Colaco, Lloyd Cardozo bad u Joshua D’Silva ki la ïoh ban thep kol na ka bynta ka Goa, katba u Pragyan Sundar, Sudeepta Konwar bad u Milan Basumatary ki la lah ban pynphai kylla na ka bynta ka Assam. Lyngba kane ka jingïakhaid ka Goa (8 point) ka la wan ha ka kyrdan ba-ar hadien ba la lah ban tam ïa ka Kerala lyngba ka jingïapher kol. Katba ka Assam ka la ïoh 6 point. Namar kata, kitei baroh saw tylli ki kynhun (Services, Goa, Kerala bad ka Assam) ki la ïoh rung sha ka quarter-final.
