Washington, Lber:
Katkum ki khubor la ong ba ki pulit ka United States ki la pynngat kyndon pyrshah ia kawei ka longkmie lem bad u samla jong ka namar ka jingleh dusmon ia uwei khyllung ba dang 3 snem ka rta namar ka la phah ia utei u khyllung sha jngai na la ka kti khnang ba un nang ban im kum u khynnah uba la heh-la san. Katba la ong ba utei u khyllung u la shu jah bad sakma haduh kumba shitaiew tam. La ong ba ki bor pyniaid ka Wisconsin ki la phah wad ia utei u khyllung hadien ba katei ka kmie ka la phah leit shong ia u bad u samla jong ka kum ka jingpynsaja. Ia utei u khyllung la ithuh kum u Elijah Vue, la iohi khatduh ia u ha ka 20 tarik u Rymphang ha ka nongbah Twi Rivers katba u dang don bad u Jesse Vang, u briew uba don jingiadei bad katei ka kmie jong utei u khyllung, ka Katrina Baur.
U Vang, uba la don 39 snem ka rta bad ha katei ka jingjah jong utei u khyllung, u la leit ujor sha ki pulit bad iathuh ha ki pulit ba utei u khyllung 3 snem u la jah na ka iingsah lajong ha katei ka 20 tarik katba u Vang u dang iohthiah bad lip khmat ha ka por mynsngi katba utei u khyllung u dang hap hapoh ka jing-khmih jong u. La ong ba u Vang u kwah ban iarap ia ka Katrina namar ka ju ud ba utei u khyllung u don ka jinglong kaba kham pher bad u dakaid bad saitlah bha. Kumta la ong ba u Vang u la shim hi noh ia utei u khyllung khnang ba un ioh ban hikai bad pyn-kylla ia ki jinglong jong utei u khyllung kumba la ujor da katei ka kmie, kaba dei ka samla jong u Vang.
Haba la tohkit da ki pulit, u Vang u la phla ba u dap da ka jingsngewsih bad jingsngew synei ia utei u khyllung uba dang 3 snem ka rta bad ka jingpyrshang jong u ban pynkohnguh bad pynkylla jubor ia utei u khyllung u bym pat tip eiei ka long kaba bakla. Namar kata, ruh u Vang u la kular ba un nym leh shuh ia kum katei ka kam ha ki por ki ban wan.
