Vijayawada, Rymphang:
U heh nongïalam jong ka seng TDP u N Chandrababu Naidu bad u heh jong ka seng Jana Sena u Pawan Kalyan kin sa leit jngoh ïa ka Delhi na ka bynta shi sngi ne ar sngi ban pynlong ïa ka jingïakren bad ka jingïamir jingmut bad ka kynhun ki heh nongïalam jong ka seng BJP ha kaba ïadei bad ka jingïatreilang na ka bynta ka ilekshon.
Kumba la ïathuh ka tyllong khubor la ong, ba naba ka seng BJP ka la don jingthmu ban pynbna ïa ka thup kyrteng kaba nyngkong jong ki kyrtong ha ka taïew kaba nyngkong jong une u bnai ki ban ïakhun ïa ka ilekshon, u Naidu bad u Pawan Kalyan shen kin sa leit ban jngoh ïa ka nongbah Delhi na ka bynta ka jingïakren ban wanrah ka jingïatreilang bad ka seng BJP ha Andhra Pradesh.
Wat lada ka la don ka jingong ba ka seng BJP kan ïatreilang bad ka seng TDP-JSP hadien ka jingïakren hapdeng u Naidu bad u Myntri ka tnat ki kam pohïing jong ka sorkar kmie u Amit Shah ha ki lai taïew ba la leit, kam shym la don kano kano ka jingpyntreikam.
Ha ka jingshisha, ka seng TDP bad ka JSP ki la pynsahteng ha kaba ïadei bad ka jingpynbna ïa ki kyrteng jong ki kyrtong na ka bynta katto katne sngi, ha kaba la khmih lynti ïa ka jingbtah halor kane na ka kynhun nongïalam jong ka seng BJP ha Delhi. Naba kam shym la don kano kano ka jubab ka ban wan na ka seng, ka seng TDP bad ka JSP ki la pynbna ïa ki kyrteng jong ki kyrtong.
