Shillong, Lber 01
Uwei u nongkiew lum na ka Jylla, u Ricky Rani, u la shah jied ha ka synjuk ïalehkai jong ka Meghalaya Sport Climbing and Mountaineering Association (MeSCMA) ban leit shah pyntbit ha ka ‘Basic Mountaineering Course’ ka ban neh haduh shi bnai kynthih ha Himalayan Mountaineering Institute, Darjeeling.
Kane ka jingshah hikai kan sdang naduh 1 tarik haduh 28 tarik mynta u bnai bad la bei tyngka lyngba ka tnat Sports and Youth Affairs jong ka Sorkar Jylla.
Kane ka prokram ai jinghikai ka dei kaba ïasoh lang lyngba ka bor met bor phad, ka bor jabieng bad ka jingkhlaiñ ha ka jingïatrei lang kum ka kynhun. Hashwa ba ki nongshah hikai ki nongïalehkai kin hap ban pynkhreh bha ïa lade haduh saw bnai ryngkat ki jingbam ba tei lem bad ka jingkilanmet.
Kumta ka jingleit shim bynta u Ricky uba na Lad Mawphlang kan long ka jingmyntoi kaba khraw ïa katei ka synjuk ïalehkai ha ka ban nangkiew shaphrang, ban pynshlur ïa ki samla jong ka Jylla ha kane ka kam ïalehkai bad kaba long ruh ka kam kaba lah ban ai jingïarap haba wan ki jingshah lynshop ha ki bor ka mariang.
