Jowai, Lber 01
Ka jingrwai ilekshon ‘Prah’ ka la pawnam haduh katta-katta ha Ri-lum Jaiñtia haduh ba ka la kylla ka mat ïakren jong uwei u nongïalam na kawei pat ka seng saiñ pyrthei.
Une u nongïalam u dei u MDC ka UDP bad u Deputy CEM ka JHADC, Bah Lasky Rymbai uba la ai jingkren ha ka jingïalang jong ka UDP West Jaiñtia Hills District ha New Hills ha ka Sngi Thohdieng.
Haba ai jingkren ha ka jingïalang, u Bah Rymbai u la ong ka jingngeit biej ka la sdang ban khihwin ha ki kyndong kynshrot bad kumta “wat ngop ha ka jingpynbiej kiwei ki seng khamtam ka seng thymmai ka ‘VPP’, khlem da pynshong nongrim shano kan ïalam.”
“Kat shaba leit sharum-shaneng tang ïa uta u ‘Prah’ beit, hynrei ha ka jingïohi jong nga, kam don kawei ruh ka ishu na ka bynta ban pynim ïa ka jaidbynriew hynrei tang ka ishu ban pynshad pynsngewbha ïa ki paidbah,” la ong u Bah Lasky Rymbai.
Une u MDC u la pynkynmaw ruh ba ha ka dorbar kaba dang shu dep shen, ka UDP lyngba u MLA jong ka, u Bah Renikton Tongkhar u la wanrah hapoh ka ïingdorbar ïa ka mat jong ka jaidbynriew – kata ka ‘Roster System’ kaba la pynkyndit ïa ka Sorkar bad ïa ki samla kiba la nang la stad.
Une u MDC u la kyntu ruh ïa ki dkhot nongkitkam ka seng ban pynsngewthuh ïa u paidbah nongshong shnong Khasi-Jaiñtia ban ïatreilang bad ka kynhun RDA khnang ban pynjop donburom ïa u kyrtong jong ka u Bah Robertjune Kharjahrin bad ba ka seng ruh kan skhem ka nongrim bad kiew na ka por sha ka por.
