Shillong, Lber 01
Ka Myntri ka tnat ka koit ka khiah, Kong Ampareen Lyngdoh, ka la ong ba ym lah ban pynbor ïa kito kiba la pyndep ïa ka jingpule MBBS ban wan noh sha Jylla ban ai jingshakri kum ki doktor ha ki jaka sumar jong ka Sorkar namar ki don ruh kiba siew noh ïa ka bai pynlut kaba ki la ïateh kular (bond) bad ka Sorkar Jylla, hynrei ki don ruh katto-katne ngut kiba bteng ïa ka jingpule Post Graduate (PG).
Ka Kong Ampareen ka la pynpaw ïa kane haba ki nongthoh khubor ki buh jingkylli balei na ka Sorkar naduh ki Sorkar kiba mynshwa haduh mynta ym shym la leh eiei ïa kito kiba ka la kyrshan ban leit pule doktor namar ki don kiba khlem wanphai shuh sha Jylla hynrei ki siew noh pynban ïa ka bai pynlut kaba ki la dep ïateh kular (bond) bad ka Sorkar Jylla.
Mynta la bun phew snem, bun kiba leit pule doktor lyngba ka bhah jong ka Jylla (State Quota) kim wanphai shuh ban trei ha Jylla lajong namar ki la ïoh jaka trei sha kiwei pat ki jaka sumar kiba kham paw bad kham biang ka jingsiew.
Kum kine kiba shet kylla ïa ka Jylla, ki ju kloi ruh ban siew noh da ka pisa da kaba pynkheiñ ïa ka jingïateh kular (bond) kaba la ïateh ha ka por ba ki ïoh ban leit pule lyngba ka bhah jong ka Jylla.
Ka Kong Ampareen ka la ong ba man u snem ki don la kumno-kumno 96 ngut ki samla kiba ka Sorkar Jylla ka phah da ka jingbei pisa ka Jylla ban leit pule doktor ha ki jaka pule bapher bapher kiba don ha kiwei ki Jylla.
Ka la ong ba ki don bun kiba wanphai sha Jylla ban ai jingshakri bad na ka liang ka Sorkar ka dang lum jingkheiñ ruh ïa kiba la dep pule MBBS lyngba ka bhah leit pule ba kyrshan ka Sorkar Jylla khnang ban tip katno ngut kiba la wanphai bad kiba khlem wanphai namar ki don ruh kiba khlem wanphai shuh da kaba siew noh ïa ka pisa ban pynkut ïa ka jingïateh kular (bond) bad ka Sorkar.
Kan myntoi aïu ïa ka Sorkar ban kyrshan ïa kum kita ki samla ban leit pule doktor lyngba ka bhah jong ka Jylla haba ki kot bor ban siew noh ïa ka pisa ynda la dep pule bad kam don jingmyntoi eiei namarba ka Jylla ka mad jingeh bym biang ki doktor.
Ka Kong Ampareen ka ong ba ym lah ban pynbor ïa kiba la pyndep ïa ka jingpule MBBS ban wan noh sha Jylla ban ai jingshakri namarba ki don ruh napdeng jong ki kiba leit bteng syndon ïa ka jingpule Post Graduate (PG) kum ki doktor. Kane ka Myntri ka la ong ruh ba ka Sorkar kan wad bniah kaei kaba pynlong ïa ki doktor ban nym wan trei sha Jylla lajong, bad ka Sorkar kan sa ïakynduh ruh bad ki doktor ban ïakren ban khring ïa ki ban wanphai biang sha la kajong ka Jylla ban ai jingshakri.
Hynrei ka Kong Ampareen ka la ïathuh ba katkum ka kyndon jong ka National Medical Commission (NCM) kaba tip kum ka ‘Registration of Medical Practitioners and License to Practice Medicine Regulations, 2023″ ka la ai jingshngaiñ ïa ka Jylla Meghalaya kaba dang donkam shibun ki doktor ban wan ai jingshakri ha ki jaka sumar khamtam eh kiba don ha nongkyndong.
Ha kane ka kyndon, ka NMC ka la kren shai haba ïadei bad ka jingai laisen (license) sha kito kiba la pyndep ïa ka jingpule MBBS na ka bynta ban trei kum ki doktor.
La ong ba kito kiba dei ban ïoh laisen ynda ki la pyndep MBBS, ki dei ban thep lyngba ka ‘web portal’ jong ka Ethics & Medical Registration Board jong ka NMC bad ki dei ban jied ïa ka Jylla kaba ki dei ban leit ai jingshakri bad ïa ka jingthep kyrteng jong ki lyngba ka ‘web portal’ yn hap phah sha ka Jylla kaba ki wan ne State Medical Council (SMC).
La ong ruh ba ka State Medical Council (SMC) kan sa khmih bniah bad ynda la hun, kan sa pdiang ïa kita kiba thep kyrteng ban ïoh laisen ban trei ha kata ka Jylla ynda la dep ban siew ïa ka dor kaba dei ban oh.
Ha ka syrnot jong kata ka laisen (licence) dei ban don ruh u nombar uba dei ha ka dur jong u Unique Identification Number (UIN) ha ryngkat ka Code jong ka Jylla lane Union Territory.
Shuh shuh ha ka kyndon la kren shai ba ynda la mynjur ïa ka kot thep kyrteng da ka State Medical Council, kata ka dei ruh ban paw ha ka National Medical Register bad ruh ha ka State Medical Register.
