Shillong, Lber 03
Ka shi kol ba la ïoh khyrwit da u Darwin Nunez ha ka minit 99 kaba la biang pura ïa ka Liverpool ban khlong ïa ka jingjop na shyntur jong ka Nottingham Forest, kata hadien ba la i kumba ka jingïakhun kan kut hapdeng ka jingïakhaid.
Wat hadien 90 minit jong ka jingïalehkai, ym shym la don kiba lah ban pynkhih jar. Pynban ha ka 8 ki minit ba ai tam kaba dei artad ka ‘injury time’ ba ka Liverpool ka la ïoh ban knieh ka jingjop na ka Forest.
Haduh ka minit ba 98, la i kumba ka Liverpool kan duh noh ki 2 point bad ban ïoh tang 1 point ha kawei pat ka liang ka ban plie lad pat ïa ka Manchester City bad Arsenal ban tam shakhmat ha ka miej ïakheiñ point. Hynrei ha ka minit ba 99, ka la ïoh knieh ïa ka jingjop bad kane ka la pynkmen ïa ki nongkyrshan jong ka, kiba la ïeng na ki jaka shong ban risa hi shait.
Kane ka jingjop, ka la pynlong ïa ka Liverpool ba kan khur 63 point na ki 27 tylli ki jingïalehkai bad ban tam da 4 point ïa ka Manchester City kaba don ha ka kyrdan kaba ar, kaba la ïoh 59 point na ki 26 tylli ki jingïakhun, katba 5 point ïa ka Arsenal kaba la ïoh 58 point na ki 26 tylli ki jingïakhun.
Ha kiwei pat ki jingïalehkai jong kane ka sngi, ka jingïakhun hapdeng ka Brentford bad Chelsea ka la kut da mar 2 kol, ka West Ham United ka la jop ïa ka Everton da 3-1 kol, ka Fulham ka la jop ïa ka Brighton da 3-0 kol, ka Newcastle United ka la jop da 3-1 kol ïa ka Wolves, ka Tottenham Hotspur ka la jop ïa ka Crystal Palace da 3-1 kol bad ka Aston Villa ka la jop ïa ka Luton da 3-2 kol.
