Shillong, Lber 03
U Rev. (Dr) B.L Nongbri u la ïathuh ba ki missionary ki la trei shitom haduh 50 snem ban pynkylla ïa ka kotbah ne ka ktien bakhuid jong U Blei sha ka ktien Khasi kaba baroh mynta ki la ïoh ban pule bad ban don ha la ki jong ki kti lada thied ruh ha ka dor kaba tad.
Une Pastor u la pyntip ïa ka jingtrei shitom ki missionary mynba ki dang don ha ri Khasi ka dei ha ka por ba u sam ïa ka ktien jong U Blei ha ka jingïaseng paidbah ki samla Khasi Jaiñtia Presbyterian Provisional Synod Pdeng II kaba la long ha Balang Presbyterian Umpling, kaba hap ha Laitumkhrah Presbytery kaba la sdang naduh ka 1 tarik Lber bad pynkut ha ka 3 tarik Lber 2024 ha Windermere.
Wat la ka dei ka synod thymmai kaba dang ïaid tang ar snem hadien ba la ïakhlad bad ka KJP Synod Mihngi, hynrei ka jingdon u paidlang kiba wan sha ka jingïaseng ha ka Sngi U Blei ka la jan kot palat phew hajar. Kane ka lah ban dei namar ba la pynlong ha Shillong.
Haba phai sha ka jingïaseng ha ka por 10:30 mynstep hapdeng ka jingshit ka sngi, hynrei kam shym la don ka jingthut namar ki paidbah ki shong ha trai diengkseh kaba long ka jaka kaba pyngngad.
La pynrhem shuh shuh ïa kane ka jingïaseng da ka jingrwai na ki samla ka Balang Siatbakon, Laitjem bad Standing Choir, Shillong Sepngi Presbytery bad la sam ïa ka ktien U Blei da u Pastor NB Diengdoh.
Haba phai sha ka jingïaseng kaba arsien ha ka por 1:30 nohphai sngi la sam ïa ka ktien U Blei da u Pastor BL Nongbri bad la pynrhem shuh shuh ïa ka jingïaseng da ka jingrwai na ki samla ka Balang Umpling, Syntung, Standing Choir Laitumkhrah Presbytery bad Standing Choir KJP Provisional Synod Pdeng.
Haba sam ïa ka ktien U Blei sha ki parabangeit ha kane ka jingïaseng, u Pastor BL Nongbri u la pynkynmaw haba ki missionary ki la pynkylla ïa ka kotbah sha ka ktien Phareng ha ri Bilat ki la mad shibun ki jingeh namar don kiba la shah pynïap ruh bad don ki ri ha ka pyrthei kim shah ruh ban pule ïa ka ktien U Blei.
U la pynkynmaw ba ha ri Khasi Jaiñtia ki missionary ki la lah ban pyndep haduh 50 snem ban pynkylla ïa ka kotbah sha ka ktien Khasi namar ha u snem 1846 u Thomas Jones u la pynkylla nyngkong ïa ka gospel u Mathew, ha u snem 1871 la ïoh ïa ka jutang kaba thymmai ne ka testament bathymmai bad ha u snem 1891 la ïoh pura ïa ka kotbok hadien ba la dep pynkylla Khasi lut.
U la ong ba ka jingwan ka gospel sha ka Ri-lum Khasi bad Jaiñtia ka la poi sha ka 180 snem. Kane ka dei ka jingtrei shitom ki missionary ban wanrah jingshai sha kane ka ri haduh mynta.
Shuh shuh u la pynpaw ruh ba ka jingkhih phaloh ha ri India hynrei um tip shano kan ïai lam namar ba ka jingtynjuh ka la wan jia ïa ki Khristan ha Assam bad u la ong biang ba um tip aïu kum ki Khristan kin dang ïakynduh katba dang ïaid ki sngi ki snem.
