Shillong, Lber 03
Ka jingïakhun hapdeng jong ka Real Madrid pyrshah ïa ka Valencia ha ka lympung La Liga ka la kut noh ha ka jingïakhaid da mar 2 kol. Ha kane ka jingïalehkai u rangïalehkai shakhmat ka Madrid u Jude Bellingham u la shah sei ‘Red Card’ hadien ba la kut ka jingïalehkai.
Haba phai sha ka jingïalehkai, ka Valencia tang hapoh ka 30 minit ka la ïoh ban khyrwit haduh ar tylli ki kol, kata ïa ka kol ba nyngkong la thep da u Hugo Duro ha ka minit kaba 27 bad ha ka minit ba 30 la thep da u Roman Yaremchuk hynrei shwa ban wai ka kylla step, ka Real Madrid ka la ïoh ban pynphai shi kol lyngba u Vinicius Jr.
Ka jingïakhun ha ka kylla miet ka la nang itynnad shuh shuh namar baroh ar liang ki la ïakhun tyngeh ban nang ïoh pynkhih jar bad dei ha ka minit kaba 76 ba u Vinicius Jr u la ïoh ban pynphai ïa ka kol ba ar ïa ka Real Madrid.
U Bellingham u la pyrkhat ba u la lah ban pynjop ïa ka Real Madrid ha ki minit kaba 6 jong ka por ba la ai ha ka ‘injury time’ hadien ba u la pyndei da ka khlieh ïa ka bol hynrei na ka liang u referee u Gil Manzano u la dep ban put pynwai ïa ka jingïalehkai shwa ban kynjat ïa ka bol.
Mar kumta na ka liang ki rangïalehkai ka Real Madrid ryngkat ki nongtrei jong ka, ki la ker pyllun ïa u Manzano bad ruh u Bellingham uba la ujor pyrshah ïa kane, ba u la shah pynduh noh ïa ka kol, ka la pynlong ïa u referee ban sei da ka ‘Red Card’.
Kane ka jingïakhaid ka la pynlong ïa ka Real Madrid ban bteng ïa ka jingbym pat shah rem sha ki 21 tylli ki jingïalehkai bad ruh ban nang pyntam point ha ka kyrdan ba nyngkong ha ka miej ïakheiñ point.
Lyngba kane ka jingïakhaid ka Real Madrid ka la kamai 66 point na ki 27 tylli ki jingïalehkai bad ban tam da 7 point ïa ka Girona kaba don ha ka kyrdan kaba ar kaba la kamai 59 point na ki 26 tylli ki jingïalehkai, kumta lada ka Girona kan khur jingjop, kan nang lah ban pynduna sha ka 4 point.
Haba phai sha kiwei pat ki jingïalehkai kane ka lympung, ka Sevilla ka la pynliem noh ïa ka Real Sociedad da 3-2 kol, ka Rayo Vallecano ka la ïakhaid da mar shi kol ha ka jingïakhun pyrshah ïa ka Cadiz bad kumjuh ruh ka jingïalehkai hapdeng ka Getafe pyrshah ïa ka Las Palmas ka la kut ha ka jingïakhaid da mar 3 kol.
