Shillong, Lber 03
Ka Khalsa Warriors Cricket Club ka la khur jingjop ha ka lympung ïalehkai First Division Shillong Cricket League ba la pynïaid da ka Shillong Cricket Association kaba la long ha ka Sngi U Blei ha madan Polo.
Haba phai sha ka jingïalehkai, ka Masonic Cricket Club kaba la jop ïa kynting pisa ka la kam trai ban tied nyngkong. Na ki 30 over ka la kamai 129 run bad hap lut baroh ki wiket.
U Bharat Rana marwei u la tied haduh 57 run na ki 85 tylli ki bol katba u Kushaldeep Singh ka Khalsa Warriors uba la kawang 8 over u la khur 3 wiket bad ai tang 17 run bad u Sawan Singh uba la kawang 7 over, u la khur 4 wiket bad ai 32 run.
Haba beh ïa katei ka thong, ki nongtied ka Khalsa Warriors ki la lah ban kamai tang ha ka over kaba 23.3 over kata ban kamai 132 run bad hap 6 wiket.
U Aditya Mahala u la kamai 40 run na ki 34 tylli ki bol bad u Kushaldeep Singh u la tied 25 run na ki 22 tylli ki bol, katba u Bhuwan Thapa ka Masonic uba la kawang 8 over u la ai 24 run bad khur 3 wiket.
Kumta kane ka la pynlong ïa ka Khalsa Warriors ba kan jop ïa kane ka jingïalehkai da 4 wiket bad ha kane ka sngi ïa ka nam ‘Player of the Match’ la ïoh ban khur da u Kushaldeep Singh uba la lah ban tied 25 run bad kumjuh ruh ban khur 3 tylli ki wiket.
