Shillong, Lber 03
Ka tnat kaba peit ïa ka jingpluh ding ha Jylla ka la sdang ban pynlong ka jingkhmih bniah ïa ki ïing rim kiba dei ruh ki ïing dieng kynthup ïa ka ïing sah u Lat ha kane ka nongbah kaba la don mynta la palat 120 snem kum ka lad ban khanglad ïa kino-kino ki jingjia sngewsih khamtam namar ka jingpluh ding.
Ïa kane la leh da ka tnat Fire and Emergency Services kum shi bynta ban khanglad ïa kino-kino ki jingjia kiba lah ban lynshop khamtam ha ki ïing sorkar kiba la rim kiba don naduh hyndai ha ka por jong ka Sorkar Phareng.
Ki don bun tylli ki ïing dieng ha Shillong kiba la pyndonkam kum ki ophisar Sorkar bad ki don ruh ki jaka sah jong ki heh ki haiñ nalor ki ïing jong ki riewshimet.
Ka tyllong khubor ka ïathuh ba kane ka jingkhmih bniah ka la wan ruh hadien ka jingpluh jong ka shlem treikam ka Shillong Bar Association ha ka miet 24 tarik u Rymphang ha kaba ka daw ka dei namar ka bording ilektrik.
Kane ka shlem treikam jong ka Shillong Bar Association ka la ïeng naduh u snem 1913.
La ong ba ki briew ka Fire and Emergency Services ki la pynlong ka jingpeit bniah da kaba khmih ïa ki jingdonkam hapoh jong kane ka ïing, ki tiar kiba pyndonkam naduh waïar ilektrik bad kiwei kiwei ki jingdonkam ki ban ïarap ban ïada na kino kino ki jingjia .
Nalor ka ïing sah u Lat, kiwei pat ki ïing sorkar kum ki ïing ba sah ki Myntri Sorkar bad MLA kiba donkam ban peit bniah na ka bynta ka jingshngaiñ jong kine ki ïing dieng.
Ka ïing sah u Lat ka dei kaba la tei thymmai hadien u Jumai bah 1897 uba la pynjulor ïa ki ïing ha nongbah Shillong ha ki snem ba mynshwa.
Ïa ka jingdro dur ban tei ïa ka ïing bathymmai la leh ha u Jymmang, 1898 bad ïa ka ïing bathymmai la pyndep ha u Risaw, 1903.
Ïa kane ka ïing sah u Lat la jer kyrteng kum ka “Raj Bhavan” ha ka 6 tarik Nohprah, 1951.
Ki dang don ruh bun tylli ki ïing hyndai kiba la pyndonkam kum ki shlem treikam jong ki tnat bapher bapher ka Sorkar bad kine ruh ki don jingma lada ym phikir khamtam na ka ding.
Kum kine ki ïing rim, ki dei kiba la don palat 100 snem bad lada ym phikir bha ki don ha ka jingma na ka ding.
