Tura, Lber 03
U nongïalam ka BJP bad MDC ka Tura, u Bernard Marak ha ka Sngi U Blei u la kam ba ki Block kiba la thaw thymmai bad kiba la dep pynbna shuwa ka ilekshon da u Myntri Rangbah ka Jylla, u Conrad K. Sangma ki ïai bteng ban don hapdeng ka jingbym treikam haduh mynta.
Une MDC ka Tura u la mih shakhmat bad katei ka jingkam ha ka shithi ba la phah sha u Myntri Rangbah ka Jylla, u Conrad K. Sangma.
“Nga la wan jngoh ïa ki jaka ha Adokgre, Siju, Purakhasia, Batabari bad kiwei-kiwei ha kaba phi la pynbna ïa ki C&RD Block bathymmai shuwa ka ilekshon bad lap ba kim shym la treikam. Sngewbha shim ka sienjam ban pyntreikam mardor ïa kine ki Block na bynta ka jingsuk jong ki nongïoh myntoi. Ka long kaba sngewsih ban ïohsngew ba kiba bun ki longïing haduh mynta kim pat ïoh pdiang ïa ki ïingsah lyngba ka skhim PMAY ha Ri-lum Garo bad ïa ki jingsiew na bynta ki nongïoh jingmyntoi la pynslem khnang, ha kawei ka liang kaba la pynsuki pat ïa ka kam. Ka PMAY (U) kaba dei na bynta ki jaka sor la pynslem palat ban ïa ka jingai por bad ka buh jingeh ïa kiba bun ki nongïoh jingmyntoi,” la kam u MDC ka Tura.
U la pynkynmaw ba ki ïingsah lyngba ka skhim PMAY la dei ban pyndep hapoh 95 sngi hynrei wat hadien 5-6 snem, katto-katne na ki nongïoh myntoi kim pat ïoh ïa ka ‘installment’ kaba nyngkong haduh mynta. U la kam ruh ba ki jingsiew na bynta ka NREGA ki la sahteng la bun-bun snem ha kiba bun ki Block bad wat ki jingsiew kiba dei na bynta ki tiar ki dang sahteng mynta la 4-5 snem.
“Ki nongshalan ha kiba bun ki Block ki la khate 50% na ka bai tiar shuwa ban shalan ïa ki tiar sha ki VEC – kaba la wanrah ka jingdkoh haba ïadei bad rukom shalan ïa ki tiar. Kan ïarap shi kat dei ïa ki nongïoh myntoi ka PMAY bad kiba don ‘Job Card’, lada pynkhuid noh kloi ïa ka pisa kaba sahteng,” u la bynrap.
Kiwei-kiwei ki mat kiba la pynsngew da utei u nongïalam ka BJP ki kynthup ïa ka baibam tymmen bad kiba la khlad lok, ki jingmyntoi ba sahteng jong ki nongrep bad ka jingdkoh ha ka jingpyntreikam ïa ka Jal Jeevan Mission (JJM).
