Bhubaneswar, Lber:
Wat ha shwa ban pyllait ïa ka mat treikam na ka bynta ka ilekshon Assembly ka ban sa wan, ka seng BJP ka la dep ban pynbna ba kan sa siew da mar T. 3,100 shi kwintal u kba bad pyllait ei ka bai bording sha ki nongrep lada ka wan ha ka bor synshar ha Odisha.
U President jong ka BJP ha kane jylla, u Manmohan Samal, u la ong ba ki nongrep jong ka jylla ki la shah kyntait bad shah iehbeiñ hapoh ka jingtreikam jong ka sorkar BJD naba ka jingïoh kamai jong ki ha ka shi snem ka long kaba rit tam hapoh ka ri.
Ha ka jingai jingkren ha ka jingïalang ba la pynlong jong ka BJP Krushak Morcha ha ka shlem treikam jong ka seng ha ka jylla, u Samal u la ong ba ka sorkar jylla kam shym lah ban pynbiang ha kaba ïadei bad ka jingpynmih ïa u kba bad ki jaka die jaka thied ki hap hapoh ka jingkhmih jong ki nongdie khaw. Ki nongrep kim shym ïoh ïa ka Minimum Support Price namar ka jingshah ot da 5 haduh 10 kilo u khaw ha ka shi kwintal bad kiwei pat ki jingbym soh bha jong u kba.
