Shillong, Lber 03
U Principal Legal Advisor jong ka All India Football Federation’s (AIFF) u Nilanjan Bhattacharjee ha ka Sngi Saitjaiñ u la wanrah ka jingkynnoh kaba shyrkhei pyrshah ïa u President ka AIFF u Kalyan Chaubey ba u dei u briew uba bamsap bad uba la pyndonkam ïa ka pisa da ki klur ha ki kam shimet.
Halor kane ka jingkynnoh, u Kalyan Chaubey u la ong ba ki dei ki bym don jingshisha bad bym don nongrim bad un sa ïaid da ki lynti jong ka aiñ.
Ha ka shithi kaba la thoh sha u Myntri Rangbahduh ka Ri u Narendra Modi, u Nilanjan Bhattacharjee u la ong ba u Chaubey u pynïaid ïa kine ki kam bamsap lyngba ki ‘tender’ ki bym pynïaid khuid bad ka jingsam ïa ki ‘tender’.
U Bhattacharjee u la kynnoh ruh ba u Chaubey u la pyrshang ban sei ïa ka pisa na ka pla tyngka jong ka Federation bad ban pyndonkam ïa ka pisa jong ka AIFF na ka bynta ki kam shimet jong u.
U la kynnoh ba u Chaubey na ka bynta ki jingmyntoi lajong, u la ai kiba bun ki ‘tender’ kum ki broadcasting of I-League ne jingpyni ha ki TV ïa ka lympung I-League (jong ka aïom ba la dep), IWL, Santosh Trophy tang sha kawei ka kompeni, ba la buhrieh kyrteng, ba la kynnoh ba don ka jingïadei kaba jan bad une u President ba mynta ka AIFF.
“Shuh shuh ki ‘tender’ kiba long da ki klur tyngka ruh la ai bad pyllait tang sha kane kajuh ka kompeni na ka bynta ban pyni ïa ka lympung Futsal bad kiwei ki lympung,” la ong u Bhattacharjee ha ka shithi kaba u la thoh bad phah kopi ruh sha u Myntri ka tnat Kam Pohïing ka Sorkar Kmie u Amit Shah bad sha u Myntri ki tnat Kam Ïalehkai u Anurag Thakur.
“Da ki klur ka pisa, la pynlut da une u President ba mynta na ka bynta ki kam bad leit jingleit shimet ka jong u, naduh ki jaka sah. Tang na ka bynta ka jingleit sha Bangalore marwei, u la pynlut palat `40 lak tyngka,” la kynnoh u Bhattacharjee.
Halor kine ki jingkynnoh, u Chaubey u la ong ba u la dep ban pule ïa kine ki jingkynnoh bad ba un sa ïaid da ki lynti jong ka aiñ bad ong ba baroh kine ki jingkynnoh ki long ki bym don nongrim bad ïa kiba yn sa jubab da ka aiñ.
