Doha, Lber:
Ka Qatar ha kane ka kynti ka kyrmen skhem ba ka thma jong ka Israel pyrshah ia ka Gaza kan sangeh noh hadien ba ka tnat kam bar ri jong ka Qatar ka la ioh ban iakren bad ki tnat kam bar ri jong kiwei pat ki ri ba marjan. Kumta ruh ka Qatar ka la ong ba ka kyrmen skhem ba ka thma Israel kan kut noh shuwa ka jinglehniam ‘Ramadan’.
Namar la ong ruh ba ka Qatar ka long kawei na ki ri kaba la ialeh shitom bha ban wanrah ia ka jingiasuk hapdeng ka Israel bad ki lehnoh Hamas hapoh Gaza bad ka la pyrshang ruh ban iakren bad ki ri bapher bapher kum ka Palestine, ka Egypt bad ka United States khnang ba kin lah ban pynkohnguh ia ka Israel ba kan sangeh noh ia katei ka thma naka bynta ka jingbha lang jong baroh bad khamtam eh naka bynta ki paid nongshong shnong ba lui-lui jong ka Gaza kiba la kylla kordit namar ka thma hapoh ka nongbah Gaza jong ka Palestine bad kiba la shu kylla phetwir bad kim don iing- don sem shuh. Kaba kham kordit ka long ba wat hapdeng ka jingkylla phetwir jong ki, ki bam- ki dih ruh ki la thylli lut bad khamtam eh ki dawai- ki dashin ki la lut lut. Ki paidbah kiba pang ba shitom ki hap ban shu shah bad sngap satar hapdeng ka jingpang- jingshitom jongki bad don ruh kiba la hap ban shu iap jynjar namar ba kim ioh shuh ia ka jingsumar kaba ki dei ban ioh namar ka jingktah jur jong ka thma ia ka jingim jongki.
Namarkata, ka Qatar ha kane ka por ka pynpaw ia ka jingsngewkhia kaba jur halor ka jingbym lah shuh ban pynsangeh ia ka thma jong ka Israel pyrshah ia ka Gaza bad kumta ruh ka la ong ba mynta ka kyrmen skhem ba ka thma hapdeng ka Israel bad ki Hamas kan kut noh shuwa ban poi katei ka jingleh niam ‘Ramadan’ jong kitei ki jaitbynriew katei ka ri.
Namar la ong ruh ba ka Israel kam shym pynsngap ne kohnguh shuh ïano- ïano ruh ha kane ka por bad ka la phah ia ki shipai jongka ban leit hiar thma naduh na ryngkew, na duriaw bad khamtam nalor suiñ bad ka jingleit pynhiar kput jong ka Israel ia ki lehnoh Hamas ha Gaza ka la pynjot hi thiaw ia ka Gaza bad ka la shim ruh ia kumba 30 hajar ngut ki mynsiem briew kiba don ha katei ka nongbah jong ka Palestine.
Kumjuh ruh la ong ba ka Israel kam pynsngap ia ka jingkyntu jong ki ri bapher bapher ban sangeh thma namar ki Hamas ruh kim pat pyllait lut ia ki briew ba shah rahbor na Israel naduh kaba sdang jong ka thma ha ka 7 tarik u Risaw 2023. Kumta na ka liang ka Israel ruh ka la pynhiar kput khlem jingmap bad khlem pyrkhat shuh syndon ia ki paidbah kiba shong ba sah ha katei ka nongbah namar ka jingthmu jong ka Israel ka long tang ban pynduh jait bad ban pynjah kyrteng noh syndon ai katei ka kynhun lehnoh Hamas kaba synshar hi ia katei ka nongbah Gaza mynta la bun snem.
