Mairang, Lber 03
Ka Eastern West Khasi Hills District Cricket Association (EWKHDCA) ha ka sngi Saitjaiñ jong ka taïew ka la ïoh ban plie pyrda ïa ka lympung ïalehkai kriket ba la tip kum ka Eastern West Khasi Hills District T20 Cricket Tournament 2024.
Ïa katei ka lympung ïalehkai la pynlong ha madan KSA Mairang Mission ha kaba u Bah W Massar kum u BDO ka Mawthadraishan C&RD Block u la long kum u kongsan ha ryngkat ka jingdonlang jong u Bah BL Nongum, Principal ka Khadsawphra College Mairang lem ruh ki dkhot jong ka Association.
Ha kane ka lympung ki don haduh 8 tylli ki kynhun kiba wan ïashimbynta. Haba phai pat sha katei ka sngi sdang ïa ka lympung ïalehkai, ka kynhun ïalehkai jong ka Hurricane ka la ïoh jingjop da 19 run ha ka jingïalehkai pyrshah ïa ka Super XI.
Haba phai sha kane ka jingïalehkai kaba nyngkong, ka Hurricane kaba la tied nyngkong, ka la tied haduh 133 run na ki 20 tylli ki over bad duh noh 6 wiket. Haba beh ïa kane ka thong, ki nongtied ka Super XI ki la lah ban kynjoh tang 114 run bad hap lut baroh 10 tylli ki wiket tang na ki 18.5 over, kumta lyngba kane ka la pynlong ïa ka Hurricane ba kan ïoh jingjop da 19 run.
Ha katei ka sngi ïa ka khusnam ‘Man of the Match’ la ïoh ban khur da u Ablefounderman Nong-siej na ka Hurricane uba la tied marwei haduh 62 run.
