Shillong, Lber 03
Ha shwa ban sdang noh ka lympung Indian Premier League (IPL) 2024, u rangïalehkai ba dang thymmai ka Gujarat Titans ba la thied ha ka dor `3.6 klur, u la mynsaw hadien ka jingjia aksiden.
Une u rangïalehkai uba la kyrteng u Robin Minz u la ngat ha ka jingjia aksiden ha ka jingñiah ïa ka thuk thuk Superbike. Ïa kane la pynthikna da u kpa jong u, ba u khun jong u, mynta u don hapdeng ka jingshah eksamin.
“Une u rangïalehkai um shym la lah shuh ban tehlakam ïa ka bike ka jong u, haba u la ïatyngkhuh bad kawei pat ka bike. Kam shym la don jingma ne ka jingmynsaw kaba heh bad ïa mynta u dang don hapdeng ka jingkhmih bniah jong ki doctor,” la ong u kpa jong u, u Francis Minz.
Lah ban pynkynmaw ba u Robin Minz u la paw bha ha ki lad pathai khubor ha ka por ba u la shah thied ha ka Gujarat Titans ha ka ïew ïadie ïathied jong ka IPL 2024, ha kaba ka GT ka la thied ïa une u rangïalehkai ba dang 21 snem ha ka dor kaba 3.6 klur tyngka.
U Robin Minz u dei uwei na ki rangïalehkai uba bud bha ïa ki dienjat jong u MS Dhoni bad kum u Dhoni, une ruh u dei uwei na ki nongtied ba tied eh bha ïa ka bol. Kumba long mynta u Minz um pat ïalehkai satia ha ka Ranji Trophy na ka bynta ka jylla ka jong u hynrei u dei uba la don bynta ha ka kynhun jong ka Jharkhand ha ka U-19 bad U-25.
Ka Gujarat Titans kan sdang ïa ka lympung IPL 2024 ha ka 24 tarik mynta u bnai bad ka jingïakhun ba nyngkong kan long pyrshah ïa ka Mumbai Indians, ha kaba u kapten barim ka GT u Hardik Pandya un wan phai biang sha Gujarat hynrei kum u kapten jong ka Mumbai ha kane ka kynti.
