Shillong, Lber 03
Ka Shillong Lajong Football Club ka long ba la khreh ban ïakhun pyrshah ïa ka Churchill Brothers lashai ka sngi ka 4 tarik ha ka lympung I-League ka ban long ha Tilak Maidan ha Goa.
Kane ka jingïalehkai hapdeng ka Shillong La-jong pyrshah ïa ka Chur-chill Brothers kan long ha ka por 7 baje janmiet. Lah ban pynkynmaw ba ka Shillong Lajong ha ka jingïalehkai kaba la dang shu dep pyrshah ïa ka Rajasthan United ka la ïakhaid da mar 4-4 kol, kata wat hadien ka la tam lypa da 2 kol.
Ka Shillong Lajong haduh mynta na ki 16 tylli ki jingïalehkai ka la lah ban kamai haduh 26 point bad don ha ka kyrdan kaba 6 ha ka miej ïakheiñ point. Na ki 16 tylli ki jing -ïalehkai ba la dep, ka la khur jingjop 7 sien, ïa-khaid 5 sien bad ban shah rem noh ha ki 4 tylli.
Ha ka jingïakynduh bad ki lad pathai khubor ha ka Sngi U Blei, u Head Coach ka Shillong Lajong u Bah Bobby L Nongbet u la ong ba u khmih lynti ba ha kane ka jingïalehkai ban long lashai ka sngi, ka kynhun kan lah ban ïalehkai bha khamtam lei hadien ka jingbym lah ban jop ïa ka Rajasthan United.
“Nga don ka jingshaniah ba kum ka kynhun kan sa klet noh ïa kaei kaba la leit bad ban phai khmat na ka bynta kane ka jingïalehkai ban wan bad ban ïalehkai bha na ka bynta ban khur ïa ki 3 point pura bad ban ïaleh ban nang pynduna ne pynïajan ha ka jingïa ïoh point bad ki club kiba don hapoh ka Top 4 ha ka miej ïakheiñ point,” la ong u Bah Bobby.
Ha kawei pat ka liang, ka Churchill Brothers mynta ka don ha ka kyrdan kaba 11 ha ka miej ïakheiñ point na ki 17 point kiba ka la ïoh ban khur na ki 16 tylli ki jingïalehkai haduh mynta, kata ban khur jingjop 4 tylli, ïakhaid 5 tylli bad shah rem haduh 7 tylli.
