Imphal, Lber:
Ka Manipur Assembly ha ka Sngi Palei ka la pdiang ïa ka rai ban kyrpad ïa ka sorkar kmie ba kan weng noh ïa ka Suspension of Operations bad ki kynhun kieng atiar jong ka Kuki-Zo ha ka jylla.
Ka jingïasoi ïa ka soskular Suspension of Operations ka dei ka jingïateh hapdeng ka sorkar kmie, ka sorkar Manipur bad ar tylli ki kynhun kieng atiar jong ki 24 tylli ki kynhun jong ki lehnoh Kuki, kiba kynthup ïa ka Kuki National Organisations bad ka United Peoples’ Front.
Ïa kane ka soskular la ïasoi ha u snem 2008. Ka jingtreikam jong kane ka jingïasoi ka la sangeh noh ha ka Sngi Palei.
U Myntri Rangbah jong ka jylla u N Biren Singh u la ong ba ka rai jong ka jingbym pynthymmai ïa ka jingïasoi halor ka Suspension of Operations ka dei katkum ka jingkwah halor ka jingthmu ban pyntikna ban wanrah ïa ka shongsuk-shongsaiñ ha ka thaiñ.
Ka jingïakynad bashyrkhei hapdeng ka jait bynriew Meitei bad Kuki ka la sdang ha ka jylla ha u Jymmang, ha kaba ka la wanrah ïa ka jingïap jong 219 ngut ki briew.
Ki la don kumba 60,000 ngut ki briew kiba la duhnoh ïa ki jaka shong jaka sah.
Ki shipai ïada ri ha Manipur naduh kane ka por ba la mih ki jingïakynad ki la ïai bteng ban pynlong ïa ka jingleit khynra.
Ki shipai dang shen ki la don bynta ban ïakhun bad ki kynhun kieng atiar hadien ba ki la ïoh ban kurup ïa ki tiar siat bad tiar pynbthei bad ha kaba ïadei bad kane ka kynhun jong ki shipai ka la pynkhlaiñ ïa ka jingpahara ha Churachandpur distrik kaba don ha Manipur.
Kumba la ïathuh ki heh shipai, la ong ba ha ka sngi Ba-ar jong ka taïew ba la lah ka kynhun jong ki shipai na ka kynhun India Reserve Battalion (IRB), Army’s Sikh Regiments, bad ki pulit ka Manipur ki la pyni bor kylla hadien ba ki lehnoh ki la sdang ban siat sha ki bynta jong ka Senpajai bad Kanglathei ban poi sha ki shnong jong ka Uyumakhong bad Ngangkhalawai ha Bishnupur distrik ha ka por 11 baje mynmiet jong ka Lah Sngi U Blei jong ka taïew ba la lah.
Ha kaba ïadei bad kane, ym shym la don mano mano ruh ki ban ïap ne mynsaw na kane ka jingïasiat kaba markylliang.
Ka jingïakhun pyrshah hapdeng kine ki ar kynhun, ka la long hadien ba ki shipai ka tnat Assam Rifles, ha ryngkat ki pulit ka Manipur bad ka IRB ki la ïatreilang na ka bynta ban pynlong ïa ka jingleit kerkut bad khynra hajan ka Dampi Ridge bad ka Moljang kaba don ha Churachandpur.
Ha ka por ba la don ka jingpyntreikam, ki shipai ki la ïoh ban kurup ïa kiba bun ki tiar siat bad pynbthei, kiba kynthup ïa ka 7.62mm Semi-automatic Rifle, ka 12mm bore Single Barrel Rifle, u Mortar, ki kuli ïasiat, ka suloi .303 bad ki kuli ka 9mm Carbine. Ïa kine ki tiar siat ba la ïoh ban kurup la aiti sha ki pulit jong ka Manipur na ka bynta ban pynlong ïa ka jingtohkit kaba bniah.
