Amaravati, Lber:
U Myntri Rangbah jong ka Andhra Pradesh u YS Jagan Mohan Reddy naduh mynshem taïew u la pyllait ïa ka um na ka wah Krishna sha ka jaka kaba ngat ha ka jingtyrkhong um ha Kuppam konstitwensi kaba don ha Chittoor distrik ha Rajupet kaba don ha ka thaiñ Ramakuppam.
Ïa ka um na ka Srisailam Project la pyllait lyngba ka Handri Neeva Sujala Sravanthi Project kaba ka Kuppam Branch Canal ka la long shi bynta jong ka na ka bynta ban pynïoh um sha 6,300 akar ka jaka lyngba 110 tylli ki jaka pyllang um kiba don ha Kuppam konstitwensi bad ban pynbiang umbam-umdih sha 4.02 lak ngut ki briew ha Kuppam bad Palamaneru.
Ïa ka Kuppam Branch Canal kaba jrong da kumba 123.64-km- la shna ha ka jinglut kaba ` 560.29 klur hapoh ka bynta kaba ar jong ka AVR-HNSS Project. Ha ka jingai jingkren ha ka jingïalang paidbah kaba la long ha Gundusettipalli in Santhipuram mandal, u Myntri Rangbah u la batai ba ka jingpyllait um ka la long kum ka sngi kaba kyrpang ka ban sah kynmaw ha ka khana pateng jong ka thaiñ.
“Ha ka 23 tarik, Nailur, 2022, nga la kular ha ka por ba pynlong ïa ka jingïalang paidbah ba ngan pynïoh ïa ka um na ka wah Krishna sha Kuppam hadien ba la dep ban shna ne pyndep ïa ka Kuppam Branch Canal Project, ha kaba hashwa ka sorkar kaba bat ïa ka jingsynshar ka la kyntait.”
