Tura, Lber 03
Ka ACHIK ha ka Sngi U Blei ka la pynrem jur ïa ka jingkhaïi be-aiñ ïa u kwai ‘supari’ na Bangladesh sha Ri-lum Garo da kaba ong ba katei ka kam ka la wanrah ka jingsngewkhia hapdeng ki dkhot jong ki bor synshar shnong bad ka imlang-sahlang namar ka jingktah jong ka ïa ka koit ka khiah u paidbah bad ka ïoh ka kot kumjuh.
“Ka ACHIK ka pynpaw ka jingkhuslai halor katei ka kam be-aiñ. Nalor ba ka long ka jingpynkheiñ ïa ki aiñ khaïi, ka jingwan rung be-aiñ jong u kwai ‘supari’ ka don ka jingktah ha ki liang bapher-bapher. Kaba nyngkong, ka jingbam ïa u kwai ‘supari’ u bym shym la tehlakam da ki kyndon aiñ ka buh jingma ïa ka koit ka khiah, naba u lah ban long uba sniew lyngba ki jingkhleh kiba sniew. Kane ka lah ban ïalam sha ka jingkiew ha ki mat ba ïadei bad ka koit ka khiah, ba kynthup ïa ki jingpang shyntur lem bad kiwei-kiwei ki jingpang kiba don jingïadei bad ka jingbam kwai. Kumjuh, kane ka jingkhaïi be-aiñ ka pyntroiñ ïa ka ïoh ka kot da kaba knieh noh ïa ka hok khaïi-pateng ha ka liang ka khajna bad ki lad ba ïadei bad ka ïew ka hat. Ha kajuh ka por, ka wanrah ruh ïa ka jingïatynjuh ka bym khuid bad pynthut ïa ka jinglong-jingman ka ïew, ka ban ktah pat ïa ka lad kamai jong ki nongkhaïi bad nongrep kiba kohnguh ïa ka aiñ hapoh ka thaiñ,” la ong ka seng ha ka kyrwoh.
Ka seng haba khot bad wer na bynta ka jingïatreilang, ka la kyrpad ïa ki bor distrik ban shimkhia ïa ka daw tynrai jong kane ka kam be-aiñ – ka la ban jur halor ka jingdonkam ban kyntiew ïa ki bor peitngor ha ki khappud, ki lad ki lynti kiba kham pyrkhing, bad ka jingïasnohktilang ban tehlakam ïa ka jingkhaïi tuh ïa u kwai ‘supari’ lem bad kiwei-kiwei ki mar tuh.
Shuh shuh ka seng ka la kyntu ïa ka imlang-sahlang ban long kaba peitngor bad pyntip mar-mar halor kino-kino ki kam ba don jingsuba sha ki bor ba dei khmih.
