New Delhi, Lber 03
Ha ka jingpynbna ïa ki 195 ngut ki kyrtong na ka bynta ka ilekshon MP Lok Sabha, ka Bharatiya Janata Party (BJP) ka la pyntip paidbah ïa ki 11 ngut ki kyrtong ki ban ïakhun na ki konstitwensi kiba don ha Assam. Katkum ka thup kyrteng ba la pyllait, ka la paw ba haduh san ngut ki MP ba mynta ba kynthup lang ïa uwei u Myntri Sorkar Pdeng ki la shah pynduh tiket.
Na Dibrugarh konstitwensi, u MP ba mynta, u Rameswar Teli, uba long ruh u Myntri Khynnah ka tnat Petroleum & Natural Gas, u la shah pynduh tiket. Ha ka jaka jong u, ka BJP ka la jied da uwei pat u Myntri Sorkar Pdeng, u Sarbananda Sonowal, uba long ruh u Myntri Rangbah barim ka Assam kum u kyrtong.
Sa kawei pat ka MP kaba la shah pynduh tiket ka dei ka Queen Ojha na ka Guwahati konstitwensi bad ha ka jaka jong ka, la pynmih da ka kyrteng jong ka Bijuli Kalita Medhi. Ka Medhi ka dei ka Deputy Mayor barim ka Guwahati Municipal Corporation bad President barim ka Mahila Morcha jong ka BJP ha Assam.
Shuh shuh ha Diphu konstitwensi ha Karbi Anglong, u MP ba mynta, u Horen Sing Bey, u la shah pynduh tiket, bad la jied ïa u Amar Sing Tiso ban long u kyrtong bathymmai.
Ha Silchar, u Rajdeep Roy u la shah weng bad la jied da u Myntri ba mynta ha ka Sorkar Assam, u Parimal Suklabaidya.
Ha Sonitpur, u Ranjit Dutta u la shah jied ban long u kyrtong ha ka jaka jong u MP ba mynta, u Pallab Lochan Das. Mynshwa, ïa ka Sonitpur konstitwensi la ju tip kum ka Tezpur konstitwensi, hynrei ka la kylla hadien ba la pynbeit thymmai ïa ki konstitwensi.
Ha Assam, ka BJP kan ïakhun ha ki 11 na ki 14 tylli ki konstitwensi. Ha ki lai tylli kiwei pat ki konstitwensi, ka BJP kan ailad ïa ki seng kiba ïatreilang bad ka, kata, ka AGP bad ka United People’s Party Liberal (UPPL) ba kin sei ïa la ki kyrtong.
Namarkata, ka BJP kan pynïakhun da ka Bijuli Kalita Medhi na Guwahati, u Sarbananda Sonowal na Dibrugarh, u Prasad Tasa na Kaziranga-Kamakhya, u Tapan Gogoi na Jorhat, u Ranjit Dutta na Tezpur, u Dilip Saikia na Darang-Udalguri, u Kripanath Mallah na Karimganj, u Parimal Suklabaidya na Silchar, u Suresh Bora na Nagaon, u Pradan Barua na Lakhimpur, bad u Amar Singh Tiso na Diphu.
Na ka liang ka AGP kan pynïakhun kyrtong na Barpeta bad Dhubri katba ka UPPL kan pynïakhun na Kokrajhar.
