Jowai, Lber 03
Ki ‘riewngeit na ka Balang Presbyterian ki la tuid sha ka jingïaseng samla KJP Synod Mihngi kaba Arphew kaba la long ha ka Sngi U Blei ha ka Balang Presbyterian Moolang, Iapmala District kaba hap hapoh ka Rymbai Presbytery.
Kane ka jingïaseng ka la sdang naduh ka 1 tarik Lber halor ka phang “Ka jingim ‘riewblei ha ka pyrthei ba mynta”.
Ha ka por 10.30 baje mynstep ïa ka khubor na ka ktien U Blei la kren da u Rev. RS. Nongkynrih katba ha ka nohphai sngi ïa ka khubor na ka ktien U Blei la kren da u Rev. (Dr) H.C.T Sumer.
U Rev. (Dr) H.C.T Sumer haba sam ïa ka ktien U Blei u la kren halor ka phang “Ki khiew ki bym lah ban pynlwet” da kaba pynshong nongrim na ka shithi kaba 2 Paul sha ki nong Korinth 4:7-8.
Lyngba kane ka khubor u nongkren u la khot bad pynkynmaw ïa ki parabangeit ban im ha ki jingduwai khnang ban lait na ki jingsniew jong ka pyrthei.
La pynshongkun shuh shuh ïa kane ka jingïaseng da ka jingïashim bynta ki Choir na ki Balang bapher bapher ban ïaroh ïa ka kyrteng jong U Blei lyngba ki sur jingrwai.
Ki Balang kiba la shim bynta ha ki jingrwai Choir ki long ka Jingïaseng Samla Balang Kayang, Balang Nongsning, Balang Umjalasiaw, Balang Moodymmai Wah, Balang Shnongrim, Balang Mawbynna, Balang Moolang bad Standing Choir Jingïaseng samla KJP Synod Mihngi.
