Nongstoiñ, Lber 03
Ha kawei ka jingjia, uwei u briew ïa uba la tip kyrteng kum u Mcbornbonnyson Kharbani u la duh noh ïa la ka jong ka jingim hadien ba la suba jur ba u la shah pynïap dusmon.
Katkum ki tyllong khubor na ki pulit la ong ba katei ka jingjia ka la jia hynne ka miet shiteng synñia ha ki por kumba 12:15 mynstep hapoh ka jaka ïeng kali ha Taxi Stand Kynroh kaba don ha Nongstoiñ.
Ka khubor ka ong ruh ba la pynkit noh ïa utei u samla sha Civil Hospital Nongstoiñ, hynrei ki doktor ki la pynbna ba u la dep ban khlad hashwa ban poi ha kane ka jaka sumar.
Shuh shuh ka khubor la ong ruh ba na ka liang jong ki pulit ki la ïoh ban kem noh ïa u briew uba la suba donkti ha katei ka jingjia ïa uba la tip kum u Medius Mawlot uba na ka shnong Mawkaton bad na ka liang jong ki pulit ki la pynrung da ka jingujor bad haduh ba thoh ïa kane ka khubor ym pat shym la tip na kaei ka daw utei u briew u la shah pynïap, hynrei ka jingtohkit jong ki pulit ka dang ïaid shakhmat.
