New Delhi, Lber 03
Hadien ba la mih ki jingkynthoh halor ka rai jong ka BJP ban pynïakhun ïa u na Asansol, West Bengal, ha ka ilekshon MP Lok Sabha, u tyngshop bad nongrwai ha ki phlim Bhojpuri, u Pawan Singh, ha ka Sngi U Blei u la pyntip ba un ym ïakhun shuh ïa kane ka ilekshon.
Haba pyntip ïa kane lyngba ka rynsan ‘X’, u Singh u la ong, “Nga ai khublei ïa ki nongïalam ka BJP kiba la shaniah ïa nga bad kiba la pynbna ïa ka kyrteng jong nga ban long kum u kyrtong na Asansol. Hynrei ngan ym lah satia ban ïakhun ïa kane ka ilekshon namar ka don ka daw.”
U Singh, 38 snem ka rta, u dei u nongshong shnong ka Bihar, bad ka jingjied da ka BJP ïa u ban ïakhun na Asansol ka la wanrah ïa ka jingshah kynthoh. Ki don bun ruh kiba la pynkynmaw ba u Singh u la pynmih ïa katto-katne tylli ki jingrwai kiba ktah jur ïa ka longrynïeng jong kynthei Bengali.
Ki khubor ki ïathuh ba ka BJP ka la shimkhia ïa kitei ki jingkynthoh bad ka la sngewthuh ba lada ka ïaid shakhmat ban pynïakhun da u Singh, ka lah ban don ka jingktah ha Asansol. Nalorkata, la ïathuh ba ki nongïalam ka seng ki la shim da ka rai ban weng noh ïa ka kyrteng jong u Singh bad hadien kata, ïa kane ka rai la pyntip sha une u tyngshop. Dei hadien ba u la ïoh ïa ka jingbthah ba u Singh un sa pynbna ban ym ïakhun shuh na Asansol.
Lah ban kdew ba kumba ka long mynta, ïa ka Asansol la mihkhmat da uwei pat u tyngshop bapawnam, u Shatrughan Sinha na ka seng Trinamool Congress. U Sinha u la jop ha ka ilekshon shiteng samoi kaba la long ha u snem 2022 hadien ba u nongrwai, u Babul Supriyo, uba la jop kum u MP na kane ka jaka ha u snem 2014 bad 2019 na ka seng BJP, u la hiar shuki, bad u la leit pynïasoh noh sha ka Trinamool Congress.
Kiba bun na ki nongïalam ka Trinamool Congress bad kiwei pat ki seng kiba la ther ïa ka BJP halor ka rai ban pynïakhun da utei u tyngshop na Asansol.
Na ka liang u Lat barim ka jylla Meghalaya, u Tathagata Roy, uba dei ruh u nongïalam barim ka BJP ha West Bengal, u la kyntu ïa ka seng ba kan peit bniah biang ïa ka jingjied ïa u Singh kum u kyrtong MP.
“Ka TMC ka jied ïa ki kyrtong katkum ka jingsngewbit jong kawei ka kynthei katba ka BJP ka jied ïa ki kyrtong hadien ba la leh ïa ka sorjamin kaba janai. Hynrei ki nongleh ïa ka sorjamin kin ym lait na ka jingleh bakla ne jingleh shiliang khmat. Donkam ban peit bniah biang ïa ka Asansol, bad hap ban leh kloi,” la ong u Roy ha ka rynsan X.
