Guwahati, Lber 03
Ka North East Catholic Research Forum (NECRF), ka kynhun bym shah liang, ka la thoh sha u Myntri Rangbah ka Assam, u Himanta Biswa Sarma (HBS) halor ka jingkynnoh sngap jar jong u ban tehlakam ïa katto-katne ki kynhun seng kiba thmu sniew ïa ki Khristan bad ki ‘riewlum hapoh ka Jylla.
Ha ka jingthoh kaba la soi da 38 ngut ki dkhot jong kynhun, ka NECRF, ha ka Sngi U Blei ka la kyntu ïa u Myntri Rangbah ka Assam ban “leh eiei pyrshah ïa kine ki dak ki shin ki bym itynnad hapoh Assam” bad ban pyrkhat biang ha ka ban pyndonkam ïa ki kyntien ki don jingktah ha ka Assam Healing (Prevention of Evil) Practices Bill, 2024 kaba dang shu mynjur shen.
“Ka Assam Healing (Prevention of Evil) Practices Bill, 2024 ka don ïa ki kyntien kiba ïalam bakla kum ka ‘magic healing’ ne ‘magical healing’, kiba lah ban pynsngewthuh bakla ne ïalam sha ki kam be-aiñ. Ngi suba ba ïa kine ki kyntien lah ban pyndonkam ban thmu sniew ïa ki Khristan, naba i prokram jingduwai iba rit eh, lah ban batai kum ka bynta ba ïadei bad ka jingpynkoit,” la ong ka shithi.
Haba ai nuksa halor 5 tylli kiei-kiei, ka kynhun ha ka shithi ka la pynpaw ka jingsheptieng ba kiba kum kitei ki jingjia ki lah ban don jingktah ïa baroh ki Jylla ha ka thaiñ Shatei Lam Mihngi.
Na ka jingdawa bym don nongrim jong ka Janjati Dharam Suraksha Manch, ban weng noh ïa ki Khristan na ka thup ‘Schedule Tribe’ sha ka jingai por ba 15 sngi jong ka Kutumbha Suraksha Parishad ban weng ïa ki dur bad ki mot ka niam Khristan na ki skul mishon, ka kynhun ka la kdew ïa 5 tylli ki jingjia ha ka shithi, da kaba kam ruh ba ka dei ka jingthombor ïa ka niam jong ki.
Haba ban jur halor kumno ki Khristan ki la synñiang ha ka ban tei ïa ka ri khamtam ha ka pule-puthi bad ki kam shakri ha ka imlang-sahlang, ka NECRF ka la kdew ïa ka jinglah ban kynthup lang jong ki shlem ai jinghikai ki Khristan, da kaba kam ba kiba bun na ki khynnah pule ha ki, ki dei ki Hindu.
“Ngim ïohi ïa kano-kano ka daw balei kawei ka jait niam – Khristan, kan hap mad ïa kine ki jingshah pynbor ha katto-katne ki Jylla jong ka thaiñ Shatei Lam Mihngi, khamtam ha Assam, kaba long ka Jylla ha kaba baroh kiwei pat ki Jylla ka thaiñ ki la mih. Ngi sngew ba kane ka jingthmu sniew tang ïa kano-kano kaba la jied ka buh jingma ïa ka suk ka saiñ bad ka jingshngaiñ ban ïa im bad sah lang,” la ong ka shithi.
