Bengaluru, Lber:
Hadien ka jingujor jong ki nongshong shnong, ka kynhun jong ki heh ba dei khmih ïa ki khlaw jong ka BBMP ki la leit ban jurip bniah ïa ka GR Tech Park, Whitefield bad Salarpuria pvt ltd Compound namar ka jingot ïa ki dieng, bad buh ruh da ka jingujor ejahar pyrshah ïa ki. U Range Forest Officer, ka BBMP Mahadevapura Zone, u Sudarshan u la ong, “Ka kynhun ba dei khmih ïa ki khlaw jong ka BBMP kam shym ai jingbit na ka bynta ban pom ïa ki dieng. Namar kane ka daw la buh jingujor ejahar noh pyrshah ïa ka Tech Park.”
U la ong ruh ba ka Tech Park ka la ai shi bynta ka jaka jong ka sha ka Metro Project bad ka la shna ïa ka kynroh jong ka jaka. Kumta, ki dieng ki la long mynta shabar jong ka jaka jong ki. “Naba ki la kwah ban buh da ki phalor kiba heh na ka bynta ban buh jingshngaiñ ka Tech Park ka la pan jingbit ban pom ïa hynriew tylli ki dieng. Ha kaba ïadei bad kane, ki la don shuh sa kumba 19 tylli ki dieng ïa kiba la dep ban pom shwa,” la ong u Sudarshan.
Ki nongïaleh ban pynïoh ïa ka hok ki paidbah ki la pynshisha da kaba ong ba ka Tech Park ka la tam ruh wat sha ka thaiñ ba don ka lynti ïaid kjat, bad ka la pyntam ruh ïa ki jingtap tin. Ha kaba ïadei bad kane ka kynhun ba dei khmih ïa ki khlaw ka la ong ba kane ka kynhun ka dei ban don bynta tang ha ka ban khmih halor ka jingpom ïa ki dieng lait nangta kam dei ban peit halor kiwei pat ki bynta.
U nongïaleh ban pynïoh ïa ka hok jong ki paidbah u Sandeep Anirudhan u la ong ba ki tin kiba la tam sha ki lynti ïaid kjat bad ki jaka paidbah ka la long shi bnai shwa ban don ka jingmaham halor ka jingpom ïa ki dieng. Ka BBMP kam shym leh ei ei ha kaba ïadei bad ka jingtam pud sha ki lynti ïaid kjat.
